Astana men London – senimdi seriktes
Tumandy Albıon parlamentinde Qazaqstan men Ulybrıtanııanyń eki jaqty qarym-qatynasyn nyǵaıtý máseleleri talqylanyp, jyl qorytyndysy jarııa etiledi. Qazaqstandyq tarap elimizdegi saıası reformalar týraly sóz qozǵap, demokratızatsııalaý úderisteri týraly aıtyp berdi. Ulybrıtanııalyq tarap eki eldiń ıgiligi úshin atqarylyp jatqan jumys nátıjesimen bólisti, dep habarlaıdy Kazinform tilshisi.
Sońǵy 30 jyl kóleminde eki el arasyndaǵy strategııalyq seriktestik nyǵaıa tústi. 2023 jyldyń ózinde joǵary deńgeıdegi issaparlar kóp boldy. Astanaǵa Ulybrıtanııanyń Syrtqy ister mınıstri, Bıznes jáne saýda isteri jónindegi memlekettik mınıstri, Qorǵanys mınıstriniń orynbasary jáne el parlamentiniń ókilderi keldi. Londonǵa Májilis tóraǵasy baryp, Qazaqstannyń atynan ІІІ Charlzdiń taqqa otyrý saltanatty sharasyna qatysty. Budan bólek birqatar mınıstrler men joǵary laýazymdy tulǵalar da Tumandy Albıonǵa at terletti.
«Brıtanııalyqtardy elimizge degen qyzyǵýshylyǵy erekshe seziledi. Qarym-qatynasty belsendirek júrgizýge degen nıeti bar. Búgingi dóńgelek ústelge qatysýshylarda bizdi alda jarqyn ári nátıjeli ister kútip tur degen ortaq paıymǵa keldi», - deıdi Qazaqstannyń Ulybrıtanııadaǵy elshisi Maǵjan Іlııasov.
Іs-sharaǵa Ulybrıtanııa Parlamentiniń depýtattary, saıasatkerler, ǵylymı ortanyń jáne bıznes qaýymdastyqtyń ókilderi qatysyp, Qazaqstannyń geosaıası jaǵdaıynyń mańyzyna toqtaldy. Alys-jaqyn memlekettermen qarym-qatynas ornatqanda ulttyq múddelerge basymdyq bergen elimizdiń syrtqy saıasatyna joǵary baǵa berdi.
«Geosaıası yntymaqtastyǵymyzdy arttyryp, baılanystarymyzdy nyǵaıtý maqsatynda jyldamyraq áreket etýimiz kerek. Qos memlekettiń de bolashaǵyn jarqyn ete túsý úshin bul isti jeke-dara emes, birige otyryp jasasaq talaı shyńdy baǵyndyrarymyz sózsiz», - deıdi Ulybrıtanııa Qorǵanys shtabynyyń burynǵy basshysy Devıd Rıchards.
Foto: Ǵalymjan Qaramanuly/Kazinform
«Birlese atqaratyn jumys kóp. Mıneraldyq resýrstar, jartylaı ótkizgish batareıa tehnologııasy jáne basqa da baǵyttar boıynsha yntymaqtastyǵymyz keńeıe túspek. Sonymen qatar bilim berý salasynda da qoıan-qoltyq jumys isteımiz. Mamandardyń biliktiligin arttyrý úshin tájirbıe almasýymyz mańyzdy», - deıdi Ulybrıtanııa parlamentiniń múshesi Pol Skallı.
Búginde Qazaqstan – bilim berý ǵana emes, energetıka, óte mańyzdy paıdaly qazbalar, klımattyń ózgerýi, qorǵanys pen qaýipsizdik syndy birqatar mańyzdy másele boıynsha Ulybrıtanııanyń Ortalyq Azııadaǵy mańyzdy ekonomıkalyq seriktesi. Saýda-sattyq qarym-qatynasy qarqyndy damyp, onyń kólemi jylyna 3 mlrd sterlıng fýntyna jýyqtap otyr. Budan bólek, Ulybrıtanııa elimizdegi iri ınvestorlardyń úzdik jetiligine kiredi.
