Astana men Almatynyń qaı aýdandarynda baspana satyp alýǵa suranys joǵary

ALMATY. KAZINFORM – Eldegi tanymal jyljymaıtyn múlik platformasynyń satý bóliminiń basshysy Imran Osmanov Almaty men Astanada úı satyp alýǵa suranys joǵary aýdandardy atady. 

Rıeltorlardyń XVI sezinde krisha.kz satý bóliminiń basshysy Imran Osmanov satyp alýshylardyń qalaýy jyl ótken saıyn ózgeretinin atap ótti.

Spıkerdiń sózinshe, ýaqyt bir ornynda turmaıdy, zamanaýı satyp alýshy damyp keledi. Keshe ózekti bolǵan nárse búginde naryq talaptaryna jaýap bermeýi múmkin. Qazir satyp alýshylardyń 41 sharshy metrden 68 sharshy metrge deıin bir jáne eki bólmeli páterge qyzyǵýshylyǵy artty. Taldaý 2024 jyldyń 1 qazanynan 2025 jyldyń 31 naýryzyna deıingi kezeńdegi derekterge negizdelgen. 

– Ortasha alǵanda, jyljymaıtyn múlik platformamyzda 78,5 kún turady. Bul óte jaqsy kórsetkish – páterdi satýǵa orta eseppen eki jarym aıdan sál astam ýaqyt qajet, - dedi Osmanov. 

Baspana satyp alýshylar arasynda eń kóp suranysqa ıe aýdan 

Sarapshynyń aıtýynsha, Almatyda úı satyp alýshylar arasynda eń kóp suranysqa ıe – Bostandyq aýdany. Áýezov aýdanyna da qyzyǵýshylyq bar. Ásirese, Abaı men Altynsarın dańǵyly qıylysatyn aýmaqta.

Baǵasyna keletin bolsaq, kóbinese satyp alýshylar páterdi 25- 46,7 mln teńge aralyǵyndaǵy somaǵa qarastyrady. Sondaı-aq quny 25-35 mln teńge aralyǵyndaǵy jańa qurylysqa da turaqty suranys bar.

– Alaıda turǵyn úı baǵasy kóterilgen saıyn osy baǵa sanattaryndaǵy qoljetimdi jyljymaıtyn múlik sany birte-birte azaıyp keledi, - dep qosty ol.

Sondaı-aq Imran Osmanov Almatyda Naýryzbaı aýdanyna qyzyǵýshylyqtyń artyp kele jatqanyn tilge tıek etti. Bul eń aldymen turǵyn úı naryǵyndaǵy qoljetimdi usynystarǵa baılanysty. Ásirese «Shuǵyla» shaǵyn aýdany suranysqa ıe, munda jóndeý jumystary júrgizilgen páterlerdi 20-40 mln teńge aralyǵynda satyp alýǵa bolady. Qosymsha artyqshylyǵy kólik ınfraqurylymynyń damyýy – aýdanda jańa metro jelisi salynyp jatyr.

Sonymen qatar Sátbaev pen Turǵyt Ozal, Abaı jáne Turǵyt Ozal kósheleriniń qıylysyndaǵy aýdandarda, Rozybaqıev kóshesindegi MEGA saýda ortalyǵynyń janynda ornalasqan páterlerge turaqty suranys bar – bul aımaq yńǵaıly ornalasýymen jáne damyǵan ınfraqurylymymen tartymdy.

El Astanasyna keletin bolsaq, sarapshynyń aıtýynsha, jańa temirjol vokzalynyń aınalasy qarqyndy damyp keledi. Munda satyp alýshylardyń sanattaryna baǵyttalǵan jańa qurylys kóp. Odan bólek «Han Shatyr» saýda ortalyǵynyń artynda ornalasqan Jaǵalaý aýdanyna da qyzyǵýshylyq joǵary, munda komfort-plıýs jáne bıznes-klass segmentterinde 25 mln teńgeden bastalady. Botanıkalyq baq aımaǵyda suranysqa ıe.

Qazaqstan rıeltorlarynyń birikken qaýymdastyǵy prezıdentiniń keńesshisi Nına Lýkıanenko jyljymaıtyn múliktiń naryqtyq baǵasy jarnamalar sanyna nemese satýshylar málimdegen somaǵa baılanysty qalyptaspaıtynyn basa aıtty.

– Turǵyn úı baǵasy kóp jaǵdaıda memlekettik qoldaýǵa baılanysty. Oǵan Biryńǵaı ulttyq zeınetaqy qorynan jınaqtalǵan zeınetaqy qarajatyn jyljymaıtyn múlik satyp alýǵa paıdalanýǵa ruqsat berilgen kezdegi baǵanyń sharyqtap ketýi jarqyn mysal. Bul qadam naryqty aıtarlyqtaı ózgertti, - dep eske aldy ol.

Sarapshynyń aıtýynsha, qazir turǵyn úı naryǵy turaqty.

– Qazir baǵanyń ósýin kórip otyrǵan joqpyz. Jasalǵan mámileler sany ótken jyldyń deńgeıinde qaldy. Qaıtalama naryqtaǵy baǵa tómendedi. Jalǵa berilentin baspana baǵasy da ósken joq, - atap ótti Lýkıanenko.

Ulttyq statıstıka bıýrosy jarııalaǵan málimetterge sáıkes, 2025 jyldyń naýryz aıynda Qazaqstandaǵy jyljymaıtyn múlik naryǵynda ártúrli úrdis baıqaldy. Osylaısha, bir aıda jańa turǵyn úı quny 0,6%-ǵa ósse, qoldanystaǵy turǵyn úı baǵasy 1,4%-ǵa artty. Bul rette jıhazy bar páterlerdi jalǵa alý, kerisinshe, ortasha eseppen 1%-ǵa tómendegenin kórsetti. 

Jańa Salyq kodeksiniń jobasyna sáıkes, eldegi bankterge korporatıvtik tabys salyǵyn 25 paıyzǵa deıin kóterý usynylyp otyr. Bul ıpoteka qunyna qalaı áser etetini týrvly sarapshylar aıtqan bolatyn.