Astana mektepterindegi beınekameralar Jedel basqarý ortalyǵyna qosylǵan - polıtsııa

ASTANA. QazAqparat – Elordadaǵy barlyq mektepterdiń beınebaqylaý kameralary Jedel basqarý ortalyǵyna qosylǵan. Bul týraly Polıtsııa departamenti Ekstremızmge qarsy is-qımyl basqarmasynyń bastyǵy Danııar Shymyrqulov aıtty, dep habarlaıdy QazAqparat tilshisi.

Polıtsııa departamentinde ótken brıfıngte D. Shymyrqulov Petropavl mektebinde baltamen shabýyl jasaǵan soń, elordalyq mektepterdiń qaýipsizdik deńgeıi týraly tilshi suraǵyna jaýap berdi.

«Bizde turaqty negizde semınarlar ótkiziledi. Qoldan jasalǵan qurylǵyny anyqtaý boıynsha sabaqtar ótkizemiz. Qazirgi ýaqytta elordalyq mektepterdegi barlyq kameralar Jedel basqarý ortalyǵyna qosylǵan. Biz bárin onlaın rejımde kóremiz, baqylaımyz. Barlyq mektepter týrnıkettermen, kúzetpen qamtylǵan, mektepterdi únemi tekserip otyramyz», - dedi Danııar Shymyrqulov.

Onyń aıtýynsha, elordada 93 mektep bar. Ekstremızmge qarsy is-qımyl basqarmasynyń qyzmetkerleri ár mektepte semınarlar ótkizedi, beınerolıkter kórsetedi. Barlyq 93 mektepte túsindirý jumystary júrgizilgen.

Sońǵy derekter boıynsha, Astanada terrorızm aktisi týraly jalǵan habarlamalar jıilep ketken. Bıyl 102 arnasyna 7 qońyraý kelip tústi, qylmystyq ister tirkelmegen.