Astana mańynan ekinshi áýejaı salynýy múmkin

ASTANA. QazAqparat – Astananyń Bas josparynda qaladan Qaraǵandy baǵytynda shyǵa beriste, elorda shekarasynan 20 shaqyrymdaı qashyqtyqta ekinshi áýejaıǵa oryn rezervteý qajettigi aıtylǵan. Astana qalasy Sáýlet jáne qala qurylysy, jer qatynastary basqarmasy basshysynyń orynbasary Aıan Smaǵulov redaktsııaǵa joldaǵan jaýabynda osy nysan týraly túsinikteme berdi, dep habarlaıdy QazAqparat tilshisi.

«Jańa áýejaıdy josparlaýǵa qatysty aıtsaq, perspektıvada yqtımal ornalastyrý úshin aýmaqty rezervteý týraly sheshim qabyldanǵan. Bul sheshim «Astana qalasyn josparlaý jáne salý» normatıvtik talaptaryna sáıkes keledi. Qolda bar halyqaralyq áýejaıdy jáne ony odan ári damytý josparlaryn eskere otyryp, mundaı sheshim bolashaqta tehnıkalyq-ekonomıkalyq negizdemeni birjaqty oryndaýdy talap etedi», - delingen jaýapta.

Basqarmanyń dereginshe, ázirge ekinshi áýejaıdyń aýmaǵy, qurylystyń qandaı kózden qarjylandyrylatyny týraly málimet joq.

«Bas josparda jańa áýejaı úshin aýmaqty rezervteý qajettiligi ǵana belgilengen. Al obektiniń kórsetkishteri, qarjylandyrý kózderi jáne t.b. mundaı qajettiliktiń bolmaýyna baılanysty belgilenbegen», - dep jazady Aıan Smaǵulov.