Astana LRT qoǵamdyq kólik valıdatorlaryn qashan qazaqshalaıdy
Astanadaǵy qoǵamdyq kólikterde ornatylǵan valıdatorlardaǵy qyzmettiń memlekettik til - qazaq tilinde kórsetilmeýine baılanysty osyǵan deıin qazaq tiliniń bir top til janashyrlary áleýmettik jelide másele kótergen bolatyn. iKomek baılanys ortalyǵy arqyly bir top til janashyrlaryna bergen jaýabynda kompanııa «valıdatorlardy qazaq tilinde aýystyrý josparlanýda», dep jaýap bergen. Alaıda bul jumystyń naqty qashan iske asyratyny aıtylmaǵan edi.
Rasynda da, valıdatordaǵy qyzmettiń tek orys tilinde jazylýy qazaq tildi tutynýshylardyń quqyǵyn shektep turǵany aıqyn. Atalmysh faktor til týraly zańnyń da baptaryna jaýap bere almaıdy. Osyǵan baılanysty QazAqparat tilshisi «Astana LRT» JShS Basqarma tóraǵasy Bekmyrza Igenberdınovke saýal hat joldaǵan edi.
Bekmyrza Igenberdınovtyń resmı jaýabyna súıensek, búgingi tańda qalanyń qoǵamdyq kóliginiń baǵdarlar jelisi 86 baǵytty qamtıdy. Olar: 61 qala, 7 ekspress, 18 qala mańyna qatynaıtyn baǵyttar.
«Atalmysh baǵyttarda 852 avtobýs qyzmet etedi. Onyń ishinde 740 avtobýs - qalalyq baǵdarda, 47 avtobýs ekspress baǵdarda jáne 65 avtobýs qala mańyna qatynaıtyn baǵdarlarda. Barlyq avtobýstar elektrondy jol júrý qurylǵylarymen - valıdatorlarmen jabdyqtalǵan», - delingen jaýapta.
Kompanııa basshylyǵy valıdatorlordaǵy qyzmet (naqtyraq aıtqanda, valıdatordyń ekranyndaǵy) shynynda da, tek orys tilinde kórsetiletinin aıtyp otyr. Biraq, bir jolǵy bılet, sondaı-aq kólik kartalaryn toltyrý týraly túbirtek qazaq tilinde basyp shyǵarylatynyn da jaýabynda atap ótken.
Sonymen birge, Bekmyrza Igenberdınov qoǵamdyq kólikterdiń valıdatorlaryn qaı ýaqytta qazaqshalaý josparlanyp otyrǵanyna qatysty suraqqa jaýap berdi.
«Valıdatorlarda aqparattardy qazaq tilinde beıneleý jónindegi sharalarǵa keletin bolsaq, mundaı ózgeristerdi engizý tehnologııalyq turǵyda qol jetimdi. Qazirgi ýaqytta synaq jáne ıntegratsııalaý jumystary júrgizilýde. Jyldyń aıaǵyna deıin barlyq jyljymaly quramda ózgeris engizý josparlanyp otyr», - dep jaýap berdi resmı saýalǵa Bekmyrza Igenberdınov.
