Astana – kún ótý qaýpi eń joǵary óńir

ASTANA. KAZINFORM — Qazgıdromet málimetinshe, elimizdiń ońtústik óńirlerinde kún qatty ysıdy. Soǵan baılanysty dárigerler kúnnen qorǵaný kerektigin eskertedi.

Byltyr elimizde 18 adamǵa kún ótip, dárigerdiń kómegine júgingen. Al jyl basynan beri 1 ǵana adam dál osylaı shaǵymdanǵan. Bul týraly Densaýlyq saqtaý mınıstrligi Kazinform tilshisiniń resmı saýalyna bergen jaýabynda málimdedi.

– 2024 jyly kún ótýdiń saldarynan elimizde 18 adam dárigerdiń kómegine júgingen, al 2025 jyldyń alǵashqy tórt aıynda mundaı bir ǵana jaǵdaı tirkelgen. Kún men jylý soqqysynyń aldyn alý úshin eń aldymen sý ishý rejımin kúsheıtý kerek. 

Sondaı-aq basty tikeleı kún sáýlesinen qorǵap, kúnniń belsendi kezeńi sanalatyn saǵat 11:00-den 16:00-ge deıin ashyq kún astynda júrmeý qajet. Bul ýaqytta aǵzaǵa qosymsha fızıkalyq júkteme túsirmegen jón.

Sonymen qatar kúnnen qorǵaıtyn arnaıy kremder qoldanyp, kıimniń jeńil, ashyq tústi ári tabıǵı matadan bolǵany abzal. Salqyn sýmen jýyný nemese shomylý deneniń qyzyp ketýinen saqtap, degıdratatsııanyń aldyn alýǵa kómektesedi. Aýa raıy ystyq kúnderi osy qarapaıym erejelerdi saqtaý arqyly óz densaýlyǵyńyzdy qorǵaı alasyz, – deıdi mınıstrlik mamandary.

Jaýaptylardyń aıtýynsha, elimizde kún ótý qaýpi eń joǵary óńir – elorda eken.

– Kún ótý derekteri eń kóp tirkelgen óńirlerdiń qatarynda Astana qalasy kósh bastap tur – munda 5 adamǵa kún ótken. Odan keıin Qostanaı oblysynda – 3, al Túrkistan oblysynda – 2 jaǵdaı tirkelgen. El óńirleriniń ishinde, ásirese Astana qalasynda kún ótý qaýpi joǵary deńgeıde saqtalyp otyr, – deıdi olar.

Aıta keteıik, densaýlyq saqtaý protsesterin tsıfrlandyratyn aqparattyq júıe qurylady.