Astana kóshelerine qandaı mýraldar kórik berip tur

NUR-SULTAN. QazAqparat – Turǵyn úıler men qoǵamdyq oryndarda beınelengen mýraldar elordanyń kelbetin ashyp, jarqyn boıaýlarmen, túrli kompozıtsııalarmen kórik berip tur. Nur-Sultan kóshelerindegi art-óner galereıasy qazaqstandyq jáne sheteldik sýretshilerdiń týyndylaryna asa baı. Qaladaǵy erekshe mýraldarǵa elorda ákimdiginiń resmı saıty sholý jasaǵan, dep habarlaıdy QazAqparat.

«Ǵarysh ortasy» mýraly - osy jazda Qabanbaı batyr dańǵylyndaǵy Dóńgelek alańnyń kópir astyndaǵy aýmaǵynda paıda boldy. Jumbaq ǵalam, zerttelmegen planetalar men ǵaryshtyq deneler bul jerge erekshe atmosfera syılaıdy.

Qazaqtyń uly aqyny Abaıdyń portreti Abaı dańǵylynda ornalasqan kópqabatty úıdiń sánin keltirip tur. Bul jumys aqynnyń 175 jyldyǵyna oraı Baıqońyr ákimdiginiń qoldaýymen salyndy.

Koronavırýspen kúreste aldyńǵy shepte júrgen medıtsına qyzmetkerlerine arnalǵan «Biz birgemiz» mýraly. Kompozıtsııa Saryarqa jáne Jangeldın kósheleriniń qıylysyndaǵy kópqabatty úıdiń qabyrǵasynda beınelengen.

Elordadaǵy turǵyn úılerdiń birinde oryndalǵan «Illıýstratsııa» keıipkerler galereıasyn sýretshi Aleksandra Kalacheva 2018 jyly Urban Fest Astana aıasynda salǵan. Sýretterde qala turǵyndarynyń kúndelikti ómiri beınelengen.

Ázerbaıjandyq sýretshi Samır Salahovtyń «Daladaǵy tús» strıt-artynda (Moldaǵulova kóshesindegi úıde) barys pen aqbóken beınelengen.

Esenberlın kóshesindegi úıde Zmogk-tyń «Tarıh» mýraly ornalasqan. Bul mýraldyń jarqyn tústeri kóz tartady. Sýrette tarıhı oqıǵalardy qaǵazǵa túsirip otyrǵan qyzdy kórýge bolady.

Evgenıı Ches-tiń «Tabıǵat taqyrybyndaǵy kollajy» beton úıler, shyny ǵımarattarmen astasqan qalalyq kóriniske tabıǵat motıvterin aralastyrady.