Astana qalasy ІІD Jergilikti polıtsııa qyzmetiniń basshysy: Turǵyndarmen tikeleı baılanysqan tıimdi

ASTANA. QazAqparat - Astana qalasy ІІD Jergilikti polıtsııa qyzmetiniń basshysy, polıtsııa polkovnıgi Baqytjan Malybaev elorda turǵyndarynyń saýaldaryna ınternet-konferentsııa arqyly jaýap berdi. Eki saǵat ishinde qalalyq departamenttiń saıtyna jáne telefon arqyly elýge jýyq saýal kelip túsken. Turǵyndardyń kóbi qalanyń qaýipsizdik máselesine alańdaıdy. Keıbiri ýchaskelik ınspektorlardyń jumysyn synǵa aldy. Ol óz kezeginde qyzmettik tekseris júrgizýge ýáde berdi.

Bul týraly «Astana aqshamy» gazeti jazady.

 «Turǵyndardyń belsendiligin eskere otyryp, aldaǵy ýaqytta paıdaly konferentsııany jıi ótkizý kerek. Árbir basshyǵa halyqpen tikeleı baılanysqan tıimdi. Máseleni birinshi bolyp anyqtaǵan soń, jumysty uıymdastyrý jeńil bolady» dedi konferentsııa qorytyndysynda sóz alǵan Baqytjan Malybaev. Nazarlaryńyzǵa konferentsııada kóterilgen keı­bir saýaldardyń jaýabyn usynamyz.

 

Elordada 795 baqylaý kamerasy bar

Álııa: Astana joldarynda qansha beınekameralar jumys isteıdi? Jyl basynan beri qansha jol kólik oqıǵasyn tirkedi? Quqyq buzýshylardy jazalaýǵa ne kedergi?
Jaýap: Elordamyzda 795 beınebaqylaý ornatylǵan. Jyl basynan beri 30 myńnan astam quqyq buzýshylyq tirkeldi. Buǵan qosa, Jergilikti polıtsııa qyzmetkerleri kún saıyn 100-ge jýyq quqyq buzýshylyqty anyqtaıdy. Bárine zań aıasynda sheshim qabyldanady.

Kúljamal Jamaldınova: Men on jylǵa jýyq ótili bar júrgizýshimin. Maǵan baǵ­dar­sham toqtap qalǵan kezde, jol qozǵalysyn retteıtin qyz­metkerlerdiń jumysy una­maıdy. Únemi keptelis týdyrady. Máselen, Qabanbaı ba­tyr kóshesindegi Tsırk pen «QazMunaıGaz» arasy - bit­peıtin keptelis. On jyl ishinde tek bir ǵana jol retteý­shiniń jumy­sy unady. Jalpy, olardyń biliktiligin arttyrýǵa nazar aýdaryńyzshy.
Jaýap: Jol polıtsııasynyń qyzmetkerleri tek shuǵyl jaǵ­daıda ǵana jol qozǵalysyn qolmen retteýge shyǵady. Olardyń kásibı biliktiligin arttyrý únemi júrgiziledi.

Maıra: Jyl basynan beri elordada qansha áıel kúıeýinen nemese basqa azamattardan turmystyq zardap shekti? Eger kúıeýi áıelin qorqytyp, únemi qońyraý shalyp, ár basqan qadamyn ańdyp júrse, polıtsııa shyn máninde onyń áıelin qorǵaı ala ma?
Jaýap: Jyl basynan beri kúıeýi nemese birge turatyn adamynan zorlyq kórgen 3000-daı áıel habarlasqan. Barlyq derek boıynsha zań aıasynda sheshim qabyldandy.

Ákimshilik jaýapqa 20 myń adam tartyldy

Sáýle: Brýsılovskıı kóshe­sindegi «Amangeldi» turǵyn úı kesheninde turamyn. Suraıyn degenim, sońǵy kezde aýlaǵa shlagbaým ornatty. Onyń basqarý pýltin 10 myń teńgege satyp alý kerek. Ony alýǵa árkimniń jaǵdaıy kele bermeıdi. Bizdiń úıde kóptegen zeınetkerler turady, olarǵa jedel járdem kóligi jıi keledi. Ármen qaraı ne bolady?
Jaýap: Atalmysh kederginiń zańdy nemese zańsyz ekenin anyqtaý maqsatynda kórsetilgen mekenjaıǵa Ákimshilik polıtsııa qyzmetkerleri barady.

Bolat: Qalada kóligi eski nemese normadan tys tútin shyǵaratyn avtokólikterdi jıi kóremin. Olar qalanyń syrtqy kelbetin ǵana qurtpaı, ekologııaǵa da zııanyn tıgizbeı me?
Jaýap: Bul boıynsha ju­mystar atqarylýda. Kólik­tiń tehnıkalyq jaǵdaıy, bel­gi­lengen SO talaptaryn saq­tamaý jiti qadaǵalanady. Osy máselege baılanysty 20 myńǵa jýyq júrgizýshi ákimshilik jaýapkershilikke tartyldy. Bul shara jalǵasyn tabady.

Aıjan: Avtobýsqa jıi mine­min. Baıqaǵanym, keıbir júrgizýshiler avtobýs ishinde temeki tarta beredi. Qaıda habar­lasqan jón?
Jaýap: Siz «102» telefonyna habarlasyńyz nemese Astana qalasy ІІD jáne qala ákimdiginiń saıtyndaǵy «halyqtyq baqy­laý» aıdaryna kúnin, ýaqytyn, quqyq buzýshylyq oryn alǵan mekenjaı, sondaı-aq avtobýs baǵyty men memlekettik nómirin kórsetińiz.

Áset: Jumabev, Taha Hýseın kóshelerinde týra joldyń ústinde qaıyr suraıtyndar kóbeıip barady. Bul olardyń ómirine qaýipti emes pe?
Jaýap: Qoǵamdyq oryndarda qaıyr suraıtyndarǵa kúndelikti baqylaý júrgiziledi. 2000-ǵa jýyq quqyq buzýshy ákimshilik jaýapqa tartyldy.

Oqýshylardy qaqqan «Leksýs» kimdiki?

Saýal: Ótkende «Lek­sýs» markaly kólik oqýshy­lardy qaǵyp ketken edi. Júrgizýshiniń kim ekeni anyqtaldy ma? Ony qandaı jaza kútip tur?
Jaýap: Júrgizýshiniń aty-jóni anyqtaldy. Qazir sotqa deıingi tergeý júrgizilýde. Sot-medıtsınalyq saraptama qorytyndysy daıyn bolǵannan keıin, protsessýaldy sheshim qabyldanady.

Gúljan: Tilendıev kóshe­siniń ýchaskelik ınspektory Erlan Shaımerdenovtiń jumysyna kóńilimiz tolady. Jaýapkershiligi mol, adal, óz isin jetik biletin qyzmetkerińizge alǵys aıtamyz.
Jaýap: Sizdiń alǵysyńyz jeke quramǵa jetkiziledi. Qyz­mettik mindetin adal atqarǵan ınspektor yntalandyrylady.

Berik: Astananyń aınalasynda jekemenshik turǵyn úıler kóp. Quqyq qorǵaý organdaryna shetki aýdan turǵyndaryna nazar aýdarýyn suraımyn.
Jaýap: «Ýchaske» is-sharasy aıasynda polıtsııa ınspektorlary ózderine tıisti aýmaqqa tú­gel tekserý jumystaryn júr­­gizedi. Onyń ishinde qala­nyń syrtyndaǵy árbir jeke úıler men saıajaılar tekseriledi.

Serik: Jedeldik jáne tur­ǵyndarmen tyǵyz baılanys úshin polıtsııa ınspektory ózi turatyn aýmaqta qyzmet isteıdi degen másele kóterilgen edi. Bul múmkin be?
Jaýap: Bul másele áli kúnge deıin ózekti. Osyǵan baılanysty jergilikti atqarýshy organmen birlese qarastyrýdamyz.

Temekige tyıym bolsa...

Saýal: Balalar oınaıtyn alańdarda úlkender temeki jıi tartady. Osyny kórgen 4 jastaǵy balam úlkeıgende temeki tartamyn deıdi. Balalar jıi baratyn oryndarda temeki tartýǵa zań boıynsha tyıym salýǵa bolmaı ma?
Jaýap: Jergilikti polıtsııa qyzmeti Astana qalasynyń ákimdigine balalar alańdarynda, skverler men saıabaqtarda temeki tartýǵa tyıym salatyn usynys joldaǵan bolatyn. Іshki saıasat basqarmasy osyǵan baılanysty áleýmettik saýalnama júrgizgen. Turǵyndardyń basym bóligi bul áreketti qoldaıtyndyqtaryn bildirgen. Qazirgi ýaqytta zań aktilerine ózgeris engizý jumystary qolǵa alyndy.

Mánsııa: Astanada qansha ýchaskelik ınspektor bar, olardyń jalaqysy qandaı? Bir ýchaskelik ınspektor bir orynda qansha ýaqyt isteıdi? Olardyń jumysy qalaı baǵalanady?
Jaýap: Ýchaskelik ınspektor­lardyń jumysyna qyzyǵýshylyq tanytqanyńyzǵa alǵys aıtamyn. Jalaqynyń azdyǵynan kadr tapshylyǵy baıqalady. Bul boıynsha ІІM men qala ákimdigine másele kóterdik. Qazirgi tańda qaralýda. Jalpy, olardyń jumysy únemi baqylaýda.

Almagúl: Jańa oqý jyly bastalǵanda syrttan stýdentter men jumysshylar kóp keledi. Búginde árbir úı syrttan kelgen azamattarǵa páterin jalǵa beredi. Olardyń qatysýymen quqyq buzýshylyq jıi tirkele me?
Jaýap: Bul - ózekti másele. Quqyq buzýshylardyń teń jartysy - ózge qaladan kelgender. Óz tarapymyzdan quqyq buzýshylyqtyń aldyn alý úshin turǵyndarǵa túsindirý jumystaryn júrgizemiz, ásirese, jastarmen bolǵan kezdesýlerde jıi kóteremiz.

Saýal: Ápkemniń úıinde kúnde qyrǵyn. Jezdem tipti qol kóterýge deıin barady. Birneshe ret ýchaskelik ınspektorǵa habarlastyq. Ol aryz jazýdy surapty. Kýáger retinde ózim shaǵymdansam bola ma?
Jaýap: Astana qalasy ІІD Jergilkti polıtsııa qyzmetiniń Áıelderdi turmystyq zorlyqtan qorǵaý bólimine habarlasyp, aqparat alyńyz. Tel: 71-60-63.

Saýal: Úıdiń birinshi qaba­tynda kafe ornalasqan. Ol jerde ishimdik ishetinder jıi jınalady. Túngi tynyshtyǵymyzdy buzady. Jalpy, birinshi qa­battaǵy osyndaı kafelerdi ja­ýyp tastaýǵa bola ma?
Jaýap: Jergilikti polıtsııa qyzmeti qala ákimdigine túngi 23.00-den keıin osyndaı oryndardyń jumysyn shekteý týraly usynys joldady, qazirgi ýaqytta qaralýda.

Daıyndaǵan:
Gúlmıra AIMAǴANBET