«Astana» halyqaralyq qarjy ortalyǵy resmı qashan ashylady

ASTANA. QazAqparat - «Astana» halyqaralyq qarjy ortalyǵynyń  (AHQO) halyqaralyq tanystyrylymy 2018 jyldyń 5 shildesinde ótedi. Bul týraly AHQO basshysy Qaırat Kelimbetov QR Syrtqy ister mınıstrliginde ótken «dóńgelek ústelde» aıtty, dep habarlaıdy QazAqparat tilshisi.

Qazir «Astana» halyqaralyq qarjy ortalyǵynda uıymdastyrýshylyq jumystar júrýde. 

«AHQO halyqaralyq tanystyrylymy kelesi jyldyń 5 shildesine josparlanǵan. Biraq 1 qańtar kúni (2018 jyl - red.) jumysymyzdy resmı bastaımyz», - dedi Kelimbetov «EKSPO-2017 murasy» taqyrybyndaǵy sharada.

Onyń aıýynsha, AHQO birneshe organdardan quralatyn bolady. Olardyń arasynda NASDAQ (amerıkalyq bırja) №3 bırjasy, Shanhaı bırjasynyń №4 bırjasy bar.

"Meniń oıymsha, atalǵan seriktester men bizdiń platforma damýdyń negizgi aspektileri bolmaq. Qytaımen birlesip júzege asyratyn AHQO bırjasy bizdiń bastamalarymyzdyń bir bóligi bolady. Sondaı-aq bul bırja Eýrazııa ekonomıkalyq odaǵyna da qatysty, sebebi negizgi naryqtarmen birge, EAEO naryǵyna da óz qyzmetimizdi usynǵymyz keledi", - dep atap ótti AHQO basqarýshysy.

Qaırat Kelimbetov atap ótkendeı, aǵylshyn zańyna negizdelgen arnaıy retteýshi mehanızm bekitiletin bolady.

«Astanada daý-damaılardy sheshý jóninde organ quramyz. Bul mekemeler Dýbaı men Ábý-Dábıdegi organdarǵa uqsas bolady. Qazir ınvestorlar quqyǵy týraly, bizdiń óńirde jumys istegisi keletin ınvestorlardy qorǵaý máseleleri jóninde pikir almasyp jatyrmyz", - dedi ol.

Kelimbetovtyń málimdeýinshe, túrli daý-damaıdy sheshetin mundaı organdardyń Astanada eki túri qurylady.

"Alǵashqysy - aǵylshyn zańyna negizdelgen AHQO sottary. Olar London, Sıngapýr, Gonkong, Ábý-Dábı naryqtarynda jumys istegen asa tájirıbeli maman bolýlary qajet. Sonymen birge, halyqaralyq tórelik (arbıtrajdyq) ortalyǵy qurylady. Atalǵan barlyq mekemeler 2018 jyldyń 1 qańtarynda tolyqqandy jumys isteı bastaıdy", - dep túıindedi sózin Qaırat Kelimbetov.