Astana halqy Muz hanzadasymen qoshtasyp jatyr
Qazaqstan qanjyǵasyna talaı júlde baılap, qazaq sportynyń jaryq juldyzyna aınalǵan Denıs 19 shilde kúni Almatyda kóshe buzaqylarynyń qolynan qaza tapqan edi.
Almatydaǵy qoshtasý rásimimen qatar ótken bul qaraly jıynǵa elordadaǵy sport qaýymdastyǵy ókilderi, bapkerler men sportshysyn joqtaǵan qala turǵyndary da qatysty.
Qabyrǵasy qaıysqan el Denıstiń sýreti beınelengen banner aldyna gúlder men maısham ákelip qoıýda.
«Ajal aıtyp kelmeıdi degen qazaqtyń sózi bar. Biz Denısti qorǵaı almadyq, saqtaı almadyq. Qanisherler ustalǵanymen, súıikti ulymyz Denıs aramyzǵa qaıtyp kelmeıdi. Denıs sporttyq jetistikterimen ǵana emes, adamı qasıetterimen, óziniń kishipeıildiligimen, kópshildigimen barshamyzdyń júregimizden oryn aldy. Jatqan jeri jaıly bolsyn», - dep kóńil aıtty qazaqstandyq sport kommentatory Dıas Ahmetshárip.
Qoshtasý rásimine kelýshiler sportshyny bir mınýt únsizdikpen eske aldy.
Qyrshyn ketken jas Almatyda 1993 jyly 13 maýsymda dúnıege keldi. Ol - Koreıada japon otarlaýshylaryna qarsy soǵysqan general Mın Gyn Honyń urpaǵy. Denıs Ten balalyq shaǵynda mýzyka, tennıs, akrobatıka, karate, sýda júzýmen aınalysyp, túptep kelgende, mánerlep syrǵanaýdy tańdady.
Denıs Ten Qazaqstannyń mánerlep syrǵanaý sporty tarıhynda jańa paraqtar jazdy. Los-Andjeleste ótken 2009 jylǵy álem chempıonatynda úzdik ondyqtyń qataryna enip, segizinshi orynǵa ıe boldy. Osylaısha ol Vankýver Olımpıadasyna Qazaqstanǵa qos birdeı joldama alyp berdi. 2010 jylǵy Olımpıadada eń jas qatysýshy bolǵanyna qaramastan, 11-inshi orynnan kórindi. Bul aldaǵy jarqyn jeńisterdiń basy edi.
2011 jyldyń aqpanynda Qazaqstanda ótken VІІ qysqy Azııa oıyndarynda Denıs Ten altyn júldeni jeńip aldy. Eki jyldan keıin Kanadada ótken álem chempıonatynda D.Ten óziniń jeke rekordy - 266,48 balǵa qol jetkizdi. Erkin baǵdarlamada úzdik shyqqan ol qorytyndyda kanadalyq Patrık Channan nebári 1,3 balǵa qalyp qoıyp, kúmis júldeni enshiledi. Sóıtip qazaqstandyq mánerlep syrǵanaýshylar arasynda alǵash ret álem chempıonatynyń júldegeri atandy. Denıstiń sporttyq jolyndaǵy basty jetistigi, árıne, Sochı Olımpıadasyndaǵy qola medal edi. Bul sol dodadaǵy Qazaqstan qorjynyndaǵy jalǵyz júlde bolatyn ári táýelsiz el tarıhynda mánerlep syrǵanaýdan alynǵan birinshi medal edi.
«Qurmet» ordeniniń jáne memlekettik «Daryn» jastar syılyǵynyń ıegeri Denıs Tenniń budan basqa da tabystarǵa qol jetkizýine jaraqattary múmkindik bermedi. 25 jyl ǵumyrynda ómirden ozǵan sportshynyń bolashaǵy alda edi. Qansha bıikke kóterilse de, óziniń kishipeıil minezinen, súıkimdi qalpynan tanbaı, halqynyń qoshemetine bólengen Denıs Tenniń jarqyn beınesi el jadynan máńgi óshpeıtini anyq.
