Astana halyqaralyq qarjy ortalyǵy qyzmetkerleriniń ortasha jalaqysy belgili boldy

ASTANA. KAZINFORM – «Astana» halyqaralyq qarjy ortalyǵynyń basqarýshysy Renat Bekturov óziniń jalaqysyna qatysty túsinik berdi.

Búgin Senattyń jalpy otyrysynan keıin tilshiler ortalyq basqarýshysynan AHQO qyzmetkerleriniń jalaqysyna qatysty suraq qoıdy.

«Qyzmetkerlerdiń eńbek ótiline, tájirıbesine baılanysty ártúrli bolady. Jas mamandar úshin tájirıbesine qaraı 300 myńnan 500 myń teńgege deıin bolady. Orta býyn mamandary – 600 myń, basshylarda 700-800 myńnan joǵary. Maǵan birinshi basshy retinde 700-800 myńnan joǵary tólenedi», - dedi R. Bekturov.

Bul turǵyda ol qyzmetke turǵan kezde jalaqy týraly málimetti jarııalamaý týraly qujatqa qol qoıǵanyn aıtty.

Sonymen qatar R. Bekturov óziniń jalaqysyn eshqaıda ınvestıtsııa retinde salmaǵanyn atap ótti.

«Birinshiden, men belsendi túrde ınvestıtsııalaı almaımyn, ýaqytym joq. Otbasymyzda artylǵan aqshany jınaýǵa tyrysamyz, biraq meniń bes balam bar. Sondyqtan artyq aqsha qalmaıdy. Biz basqalar sııaqty ıpoteka tólep jatyrmyz, sondaı-aq balabaqsha men mektep úshin tóleımiz», - dedi ol.