Astana áýejaıynda orynsyz qaljyńnyń kesirinen dabyl jarııalandy
Astana halyqaralyq áýejaıynda dabyl jarııalandy, dep habarlaıdy Kazinform.
«Jolaýshylardan jeke zattaryna muqııat bolýyn, balalar men jasóspirimderdi qaraýsyz qaldyrmaýyn, avıatsııalyq qaýipsizdik erejelerin muqııat saqtaýyn suraımyz» dep eskertti Astana halyqaralyq áýejaıynyń baspasóz qyzmetinen.
Keıinnen áýejaı jaǵdaıdy túsindirdi.
Astanadan Almatyǵa KS954 reısimen ushqaly turǵan 44 jastaǵy azamat tirkeý kezinde jol júginde qarý men esirtki bar ekenin jetkizgen.
Áýejaı qyzmetkerleri birden «qaýipti» jolaýshy turǵan aımaqty qorshaýǵa alyp, memlekettik kúzet, Ulttyq qaipsizdik qyzmeti, terrorızmge qarsy ortalyqqa jedel habarlandy.
Astana halyqaralyq áýejaıynyń avıatsııalyq qaýipsizdik qyzmeti jolaýshynyń qol júgin tekserip, ony jelilik polıtsııa bóliminiń qyzmetkerlerine tapsyrdy.
Jolaýshy polıtseılerge bergen túsiniktemesinde qol júgindegi qarý men esirtki jaıynda qaljyńdaǵanyn jetkizgen.
Ulttyq qaýipsizdik qyzmetiniń nusqamasymen Astana halyqaralyq áýejaıynda dabyl alynyp tastaldy.
Qylmystyq kodekstiń 273-baby boıynsha mundaı jaǵdaıda 5 000 AEK (17 mln teńgeden astam) kóleminde aıyppul salynady nemese 5 jylǵa bas bostandyǵynan aıyrylady.
