Astana dúkenderine reıd júrgizilip, tyıym salynǵan zattar tárkilendi
ASTANA. KAZINFORM — Astanada «Zań jáne tártip» qaǵıdaty aıasynda Almaty aýdandyq polıtsııa basqarmasy men aýdan ákimdigi qyzmetkerleriniń qatysýymen monıtorıngtik top reıdtik is-sharalar ótkizdi.
Elorda ákimdiginiń resmı saıty málim etkendeı, reıd barysynda aýdannyń eki dúkeninde nasybaı men snıýs ónimderiniń satylyp jatqany anyqtaldy.
Satýshylarǵa Qazaqstan Respýblıkasynyń Ákimshilik quqyq buzýshylyq týraly kodeksine sáıkes shara qoldanylyp, jalpy sany 10 dana tyıym salynǵan ónim (nasybaı jáne snıýs) tárkilendi.
— Atalǵan sharalar «Zań jáne tártip» qaǵıdalaryna sáıkes turaqty túrde jalǵasatyn bolady. Bul jumystar qoǵam qaýipsizdigin qamtamasyz etip qana qoımaı, azamattardyń densaýlyǵyn qorǵaýda jáne jastardy salaýatty ómir saltyna tárbıeleýde mańyzdy qadam sanalady, — dep atap ótti Almaty aýdany ákimdiginiń ishki saıasat bólimi basshysy Aıbyn Aıdynuly.
Osyǵan deıin elordada polıtseıler esirtki saqtady degen kúdikpen eki er adamdy ustaǵanyn jazǵanbyz.