«Astana» bapkeri: Komandaǵa syrttan qysym kóp boldy

ALMATY. KAZINFORM — «Astana» fýtbol klýbynyń bas bapkeri Grıgorıı Babaıan osy maýsymnyń qorytyndysyn shyǵardy.

— Maýsymnyń sońǵy matchy, qıyn bolatynyn bildik. Chempıonattaǵy eń myqty eki komanda kezdesti. Oıyn týraly aıtar bolsam: biz gol jibergenge deıin «Qaırattyń» aıqyn sátteri bolǵan joq. Biz jyldam gol soqtyq, odan keıin biraz taktıkamyzdy ózgerttik. Óıtkeni «Qaırat» qysym jasap, belsendirek oınaı bastady. Gol jibergen tusta Dastan Sátpaevtyń jyldamdyǵy sheshýshi ról atqardy. Odan keıin biz birden alǵa umtylyp, biraq taǵy eki qarymta shabýyl ótkizip aldyq. Sońynda oıyndy ózgertýge tyrystyq. Múmkindikterimiz boldy. Ókinishke qaraı, sońǵy shabýylda dop baǵanǵa tıdi de, chempıondyqtan aıyryldyq, — dedi ol.

Bapker komanda maýsym nátıjesine qatty qapalanǵanyn, biraq jankúıerlerge qoldaýy úshin alǵys aıtatynyn atap ótti. Sondaı-aq ol aldaǵy ýaqytta fýtbolǵa osyndaı qyzyǵýshylyq elimizdiń ár qalasynda bolaryna úmit bildirdi.

Grıgorıı Babaıannyń aıtýynsha, keıingi aptalarda komandaǵa qysym kórsetildi. «Aqtóbeni» 5:3 esebimen jeńgennen keıin áleýmettik jelilerde «Astanaǵa» qarsy heıt bastalǵan.

— «Astanaǵa» qarsy qatty heıt boldy. Barlyq jaǵynan qysym jasaldy. «Oıyndy satyp jiberdi», «qaqpashylar kináli» degen sııaqty neshe túrli pikirler jazyldy. Keı adamdar muny BAQ-ta taratyp, jurtty shatastyrdy. Byltyr «Aqtóbemen» oınaǵanda dál osylaı bolǵan. Bıyl «Aqtóbeni» jeńip, birinshi orynǵa shyqqan soń, qaıtadan heıt bastaldy, qysym kúsheıdi. Birden qoǵam pikirin burmalaıtyn jarııalanymdar paıda boldy… Bir pablık biz 5 gol soqsaq, «kelisilgen match» deıdi. Al «Qaıratqa» bes gol soqsa — «qaqpashyǵa kólik syılady» deıdi. Árıne, bul — fantastıka. Klýb pen jigitter munyń bárin túsindi, heıt pen qysym bar ekenin bildi. Biraq mundaı jaǵdaıda qarsy tura bilý kerek, — dedi Babaıan.

Sózi sońynda ol mundaı jaǵdaılar el fýtbolynyń damýyna kedergi keltiretinin atap ótti.

Eske salaıyq, «Qaırat» ekinshi jyl qatarynan Qazaqstan chempıony boldy.