Astana áýejaıy reıster kestesin ýaqytsha ózgertedi
ASTANA. KAZINFORM — Astana áýejaıynda ushý-qoný jolaǵynda josparly jóndeý jumystary júrgizilýine baılanysty reıster kestesine ýaqytsha ózgerister engiziledi. Bul týraly áýejaıdyń baspasóz qyzmeti málimdedi.
2026 jylǵy 15 sáýir men 31 mamyr aralyǵynda áýejaıda kún saıyn saǵat 10:00-den 18:00-ge deıin jóndeý jumystary júrgiziledi.
Osyǵan baılanysty atalǵan ýaqytqa josparlanǵan barlyq reıster aldyn ala erterek nemese keshirek ýaqyttarǵa aýystyryldy.
— Jolaýshylardan saparlaryn josparlaý kezinde osy aqparatty eskerýdi suraımyz. Ushý ýaqytynyń ózekti kestesin áýejaıdyń resmı saıtynan nemese áýe kompanııasynan aldyn ala naqtylaýdy usynamyz. Áýejaı termınaly men jolaýshylarǵa qyzmet kórsetý aımaqtary shtattyq rejımde, eshqandaı shekteýsiz jumys isteıdi, — delingen áýejaıdyń baspasóz qyzmeti habarlamasynda.
Jolaýshylar aǵynynyń jınalýyn boldyrmaý úshin jolaýshylarǵa áýejaıǵa aldyn ala kelý usynylady:
— ishki reıster úshin keminde 2 saǵat buryn;
— halyqaralyq reıster úshin keminde 3 saǵat buryn.
Júrgizilip jatqan jumystar ushý qaýipsizdigin qamtamasyz etýge jáne áýejaı ınfraqurylymynyń sapasyn arttyrýǵa baǵyttalǵan.
Aıta keteıik, Air Astana jazǵy navıgatsııaǵa kóshti. Jańa baǵyttar men qosymsha reıster týraly myna siltemeden oqyńyz.