Astana ataýyn ózgertý máselesi áli pisip-jetilgen joq - depýtattar
«Biz bul máseleni (Astana ataýyn ózgertý - red) talqylamadyq. Degenmen, eki palatanyń da depýtattary mereıtoılyq Deklaratsııa qabyldanǵan saltanatty otyrysta Deklaratsııaǵa ony engizý týraly bastama kótergen bolatyn. Biraq bul joly komıssııa (Konstıtýtsııalyq reforma jónindegi zań jobasyn ekinshi oqylymǵa daıyndaý jónindegi birlesken komıssııa - red) jazbasha usynys alǵan joq. Jalpy qalanyń, áýejaıdyń, kósheler men nysandardyń ataýyn ózgertý Parlamenttiń quzyryna jatpaıdy. Ol jergilikti organdardyń quzyryndaǵy másele», - dedi Parlament palatalarynyń otyrysynan keıin BAQ ókilderine suhbat bergen Májilis depýtaty, Konstıtýtsııalyq reforma jónindegi zań jobasyn ekinshi oqylymǵa daıyndaý jónindegi birlesken komıssııa tóraǵasy Nurlan Ábdirov.
Sonymen qatar ol mundaı bastamalardy Qazaqstannyń kez kelgen azamaty kóter alatyndyǵyn basa aıtty.
«Bizde ýnıversıtetterdiń basym bóligi elimizdiń belgili azamattarynyń esimderimen atalady. Bul máseleni máslıhat qaraıdy. Eldiń damýyna ólsheýsiz úles qosqan memlekettiń joǵary tulǵasy jaıynda sóz bolǵanda ol áli de talqylaýdy qajet etedi. Degenmen, meniń jeke pikirim, bul laıyqty. Biraq, bul másele pisip-jetilgennen keıin ǵana sheshiletin bolady», - dedi Májilis deptýtaty.
Aıta keteıik, búgin QR Parlamenti palatalarynyń birlesken otyrysynda «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» QR Zańy qabyldanǵan bolatyn .
Astana qalasyna Prezıdent Nursultan Nazarbaevtyń esimin berý týraly Darhan Káletaevtyń usynysy qoldaýsyz qaldy. Elorda ataýy ózgertilmeıtin boldy.