Astana-Almaty kúre jolynyń qurylysy aıaqtalýǵa jaqyn
ASTANA. KAZINFORM – Ortalyq-Ońtústik dálizine jatatyn respýblıkalyq mańyzy bar Astana-Almaty kúre jolynyń qurylysy aıaqtalýǵa jaqyn. Qurylys jumystary aıasynda Qaraǵandy-Balqash, Balqash-Burylbaıtal, Burylbaıtal-Kúrti jáne Shamalǵan stantsııasynyń aınalma joly jobalary júzege asyp jatyr. Bul joldyń jalpy uzyndyǵy – 946 shaqyrym.
Kólik mınıstri Marat Qarabaev qurylys jumystary júrip jatqan jol ýchaskeleriniń basyna baryp, jaýapty merdiger uıymdardyń ókilderimen kezdesken.
«Astana men Almaty arasyndaǵy joldyń qurylys sapasyn koreıalyq Dongsung Engineering jáne ISAN Corporation kompanııalary baqylaýǵa aldy. Kompanııa ınjenerleri tehnıkalyq qadaǵalaýdy júrgizip, únemi qurylys basynda», - delingen Kólik mınıstrliginiń baspasóz qyzmeti usynǵan aqparatta.
Kólik mınıstrliginiń Avtomobıl joldary komıtetinde atap ótkendeı, ýchaskelerdiń bir bóligi jazdyń ortasynan bastap qoldanysqa berilse, qalǵan bóligi 2024 jyldyń sońyna deıin halyq ıgiligine tapsyrylady.
Máselen, jalpy uzyndyǵy 363 shaqyrym Qaraǵandy-Balqash kúre jolynyń boıynda aınalma joldar múldem qalǵan joq. Joba aıasynda 11 kópir, aýyl sharýashylyǵy tehnıkasynyń ótýi úshin arnalǵan 32 jol ótpesi, kólik aıryǵy jáne temir jol arqyly ótetin jol ótpesiniń qurylysy tolyq aıaqtalǵan. Qazir abattandyrý jumystary júrgizilip jatyr. Sondaı-aq, jolshylar asfalttyń joǵarǵy qabatyn tósep, jol qozǵalysy qaýipsizdigin qamtamasyz etý úshin arnaıy tosqaýyl qorshaýlaryn ornatyp jatyr. Nysandy 2024 jyldyń qazan aıynda paıdalanýǵa berý kózdelip otyr.
Byltyr mamandar Balqash-Burylbaıtal kúre jolynyń jalpy uzyndyǵy 127 shaqyrym 3 ýchaskesin paıdalanýǵa tapsyrdy. Bıyl qalǵan 3 ýchaske qoldanysqa beriledi.
Jalpy uzyndyǵy 81 shaqyrym Kúrti-Burylbaıtal joly bıyl jazda tapsyrylady. Qazir mamandar jol boıynda abattandyrý jumystaryn júrgizip jatyr. Sonymen qatar bıyl jazda Shamalǵan beketiniń aınalma joly da qoldanysqa berilmek.
Joǵaryda atalǵan jol ýchaskeleri I-b tehnıkalyq sanatyna sáıkes tórt jolaqty bolatynyn atap ótken jón.
