Astana ákimdigi turmysy nashar túlekterdiń oqý aqysyn tólep berý úshin qujat qabyldap jatyr

ASTANA. KAZINFORM — 1 shildeden 23 tamyzǵa deıin (qosa alǵanda) Astana qalasy jumyspen qamtý jáne áleýmettik qorǵaý basqarmasy túlekterge qalanyń joǵary oqý oryndarynda kúndizgi oqý aqysyn tóleýge áleýmettik kómek kórsetý úshin qujat qabyldaıdy. Bul jaıynda elorda ákimdiginen habarlandy. 

Jyl saıyn Astana qalasynyń mektep túlekterine áleýmettik kómek kórsetiledi:

— jetim balalar;

— balalar úıiniń túlekteri;

— bala kezinen múgedektigi bar adamdar;

— ata-anasynyń qamqorlyǵynsyz qalǵan balalar;

— kópbalaly otbasynan shyqqan balalar (onyń ishinde osy jyly úlken bala — kámeletke tolǵan kezde bilim berý uıymdaryna kúndizgi oqý nysanyna túskenge deıin);

— asyraýshysynan aırylý jaǵdaıy boıynsha memlekettik járdemaqy alatyn azamattar.

Oqytý eńbek naryǵynda suranysqa ıe 36 mamandyqta júrgiziledi:

— Jalpy medıtsına;

— Farmatsııa;

— Áleýmettik jumys;

— Sáýlet (BIM menedjeri dızaıner);

— Elektr energetıkasy;

— Dene shynyqtyrý jáne sport;

— Psıhologııa;

— Esepteý tehnıkasy jáne baǵdarlamalyq qamtamasyz etý (baǵdarlamashy);

— Dızaın;

— Aqparattyq júıeler (qazaq, orys, aǵylshyn tilderinde oqytý quqyǵy bar kompıýterlik júıelerdi ázirleýshi jáne taldaýshy), aqparattyq tehnologııalar

— Azyq-túlik tehnologııasy;

— Gaz jabdyqtaryna qyzmet kórsetý ınjeneri;

— Informatıka;

— Tasymaldaýdy, qozǵalysty uıymdastyrý jáne kólikti paıdalaný (logıstıka mamany);

— Bıotehnologııa;

— Bastaýysh oqytýdyń pedagogıkasy men ádistemesi;

— Mektepke deıingi oqytý;

— Pedagogıkalyq (matematıka muǵalimi);

— Pedagogıkalyq (hımııa jáne bıologııa muǵalimi);

— Qazaq tili men ádebıeti;

— Geodezııa jáne kartografııa (web-kartografııa);

— KIPıA ınjeneri (baqylaý-ólsheý aspaptary jáne avtomattandyrý);

— Elektronıka ınjeneri;

— Qurylys;

— Jylý energetıkasy;

— Aqparattyq qaýipsizdik;

— Kógaldandyrý;

— Elektrondy kommertsııa;

— Ekonomıka jáne derekter ǵylymy salasyndaǵy bıznes-ákimshilendirý;

— Úlken derekterdi taldaý;

— Medıatehnologııalar medıa óneri;

— Sandyq medıa menedjmenti;

 — Jasandy ıntellekt tehnologııalary;

— Qurylystaǵy tsıfrlyq dızaın;

— Ekologııa jáne tabıǵatty paıdalaný;

— Gıdrologııa.

Áleýmettik kómek alý úshin ne isteý kerek?

Basqarmaǵa myna qujattardy qosa otyryp, ótinish berý qajet:

1) jeke basyn kýálandyratyn qujat;

2) jıyntyq tabysty esepteý qaǵıdasyna sáıkes adamnyń (otbasy músheleriniń) tabysy týraly málimet; 

3) ata-anasynyń qaıtys bolǵany týraly kýáliktiń kóshirmesi (jetim balalar úshin); 

4) kópbalaly otbasynyń mártebesin rastaıtyn qujattyń kóshirmesi (kópbalaly otbasynan shyqqan balalar úshin);

5) týý týraly kýáliktiń kóshirmesi (jetim balalar úshin);

6) Astana qalasynyń orta mektebin bitirgeni týraly attestat;

7) ulttyq biryńǵaı testileý nátıjesi kórsetilgen memlekettik sertıfıkat. 

8) Ekinshi deńgeıdegi banktegi ne «Qazposhta» aktsıonerlik qoǵamyndaǵy banktik shottyń nómiri týraly málimet.

Aıta ketý kerek, jan basyna shaqqandaǵy ortasha tabysy otbasynyń bir múshesine shaqqanda 4 kúnkóris deńgeıinen aspaıtyn aqshalaı tólem túrinde áleýmettik kómek taǵaıyndalady.

Áleýmettik kómek alý úshin Astana qalasy jumyspen qamtý jáne áleýmettik qorǵaý basqarmasyna Beıbitshilik kóshesi, 9 mekenjaıyna júginý ne qujattardy veb-portal arqyly elektrondy túrde ótkizý qajet.

Aıtpaqshy, testileý kezinde eń tómengi baldy jınamaǵan mektep túlekterine áleýmettik kómek taǵaıyndalmaıdy.

Aýdan turǵyndary úshin anyqtama telefondary:

Almaty: 55-01-74, 8 702 837 50 05;

Baıqońyr: 55-72-32, 8 771 830 32 78;

Esil: 55-74-50, 8 705 427 92 40;

Nura: 55-68-40, 8702-149-02-55;

Saryarqa: 55-14-87, 8701 621 62 99, 8702-546-86-95.