Astana ákimi LRT qurylysynyń barysy týraly aıtty

ASTANA. KAZINFORM — Astana qalasynyń ákimi Jeńis Qasymbek Instagram-daǵy paraqshasynda LRT qurylysy qalaı júrip jatqany týraly jazdy.

— № 112 stantsııaǵa (Abý Dabı Plaza) baryp, LRT qurylysynyń barysymen tanystym. Máselen, Abý Dabı Plazadaǵy № 112 stantsııada jalpy aýdany shamamen 5 myń sharshy metr bolatyn qasbettiń syrtqy metall qańqasyn montajdaý, ary qaraı vıtrajdar men panelderdi ornatý jumysy júrgizilip jatyr. Bıyl 3-toqsanda synaq jumysyn bastaý úshin osyǵan uqsas jumys barlyq 18 stantsııada aıaqtalatyn bolady, — dedi ákim.

Onyń sózinshe, osyǵan deıin estakadanyń qurylysy aıaqtalyp, stantsııalardyń negizgi temirbeton konstrýktsııalary salynǵan.

— Esil ózeni arqyly ótetin aspaly kópirdiń qurylysy, 101-stantsııanyń qasbettik bóliginiń qurylysy aıaqtaldy. Sol sııaqty LRT quramynyń 19 birligine tapsyrys berildi. LRT jelisi stantsııalarynyń negizgi temirbeton konstrýktsııalarynyń qurylysy 100% aıaqtaldy. № 116 jáne № 117 stantsııalar arasyndaǵy estakada ýchaskesinde rels jolynyń alǵashqy 500 metri tóseldi. 2025 jyldyń sońyna deıin joldyń joǵarǵy bóliginiń qurylysyn tolyqtaı aıaqtaý, onyń ishinde relsterdi tóseý, dabyl jáne baılanys júıelerin baptaý, stantsııalardy ishki jáne syrtqy árleý, quramdardy jetkizýmen depo salý josparlanyp otyr, — dep túsindirdi Jeńis Qasymbek.

Sonymen qatar, elorda ákimi 2025 jyly Qabanbaı batyr dańǵyly men Qaldaıaqov kóshesindegi LRT-nyń astyńǵy estakadalyq bóligin abattandyrý josparlanyp otyrǵanyn aıtty.

— Biz LRT boıyndaǵy marshrýtty kezeń-kezeńimen abattandyramyz. Mysaly, bıyl Qabanbaı batyr dańǵylyn áýejaıdan Máńgilik el dańǵylyna deıin aýqymdy kógaldandyrý josparlanǵan. Syǵanaq kóshesiniń boıyndaǵy ýchaskede (Qabanbaı batyr dańǵylynan Táýelsizdik dańǵylyna deıin) aǵashtar, velojoldar, biryńǵaı stıldegi kóshe jıhazdary ornatylady. LRT-nyń negizgi aıaldamalarynyń janynda — Mega Silk Way SOO, botanıkalyq baq jáne «Pokolenıe» TK mańynda qala turǵyndarynyń demalysy men ýaqytyn paıdaly ótkizýi úshin jańa qoǵamdyq keńistikter ashylady. Olar zamanaýı abattandyrylǵan, qalanyń tartymdy ári yńǵaıly oryndarynyń birine aınalady, — dep jazdy Jeńis Qasymbek.

Budan buryn Astanada LRT-nyń alǵashqy daıyn stansasy kórsetildi.