Assambleıanyń 30 jyldyǵy Qaraǵandydaǵy saltanatty jıynnan bastaldy
QARAǴANDY. KAZINFORM – Qaraǵandyda Qazaqstan halqy Assambleıasynyń 30 jyldyǵyn merekeleý bastaldy. Mereıtoılyq kúnge jáne Jumysshy mamandyqtary jylyna oraı Aqsaqaldar keńesi «Adal azamat» jobasyn usyndy.
Jeńimpazdar jeti nomınatsııa boıynsha marapattaldy. Laýreattar – ártúrli mamandyq ıeleri, olar ózderiniń kúndelikti eńbegimen óńirdiń jáne jalpy eldiń damýyna eleýli úles qosyp jatyr.
– Biz barshaǵa mańyzdy kún – Qazaqstan halqy Assambleıasynyń 30 jyldyǵyn atap ótemiz. Qoǵamdaǵy birlik pen beıbitshilik bizdiń barlyq jetistigimizdiń basty kepili bolǵan jáne bolyp qala beredi. Assambleıanyń barlyq qurylymdary elimizdiń áleýmettik jáne qoǵamdyq damýyna ózderiniń baǵa jetpes úlesin qosyp jatyr. Biraq meniń oıymsha, Aqsaqaldar keńesiniń erekshe orny bar. Aqsaqaldar – bizdiń halqymyzdyń danalyǵy, aqyly, tájirıbesi ǵoı! – dep Qaraǵandy oblysynyń ákimi Ermaǵanbet Bólekpaev merekeniń syıly meımandaryn qurmetpen qarsy aldy.
QHA tóraǵasynyń orynbasary, QR PÁ QHA Hatshylyǵynyń meńgerýshisi Marat Ázilhanov mereıtoılyq jylda 400-den astam iri is-shara josparlanyp otyrǵanyn habarlady.
– Birlik pen eńbek – bizdiń qoǵamymyzdyń gúldenýiniń negizi. Bul is-sharalar adamdar arasynda, onyń ishinde eńbek adamynyń janynda bolýǵa baǵyttalǵan. Eńbek adamdaryn qurmetteýge arnalǵan búgingi joba – solardyń biri, – dep atap ótti ol.
Óz qyzmetiniń úzdikterin qoǵamdyq komıssııa tańdady. Bas marapatqa eńbek ardageri, Buqar jyraý aýdanynyń qurmetti turǵyny Nesibeldi Dosanova ıe boldy. Ol 17 jasynda saýynshy bolyp jumysqa kirisip, 40 jyldaı eńbek etti. Kópbalaly otbasynda úlkenderdiń biri bolyp, bes balany ózi ósirdi. Búginde Nesibeldi apanyń 11 nemere men 16 shóberesi bar. Uzaq ómir súrgen ana kóptegen marapattarǵa ıe bolǵan. Ol eki «Eńbek Qyzyl Tý» ordenin eń qundy marapat dep sanaıdy. «Eren eńbek ıesi» nomınatsııasyn kenshi, «Shahter dańqy» ıegeri Nurlan Sátmaǵambetov ıelendi.
– Uly Otan soǵysy kezinde meniń ájem shahtada jumys istep, kómir óndirip, erlerdiń eńbegin óz moınyna aldy. Áskerden keıin ýchılışede oqyp, «Stahanovskaıa» shahtasynda jumys isteı bastadym. Mine, 36 jyldan beri jer astynda eńbek etip kelemin. Qazir Túsip Kúzembaev atyndaǵy shahtada brıgada basqaramyn. Óz tájirıbemdi jas jumysshylarǵa úıretip jatyrmyn. Búgin marapattalǵanym qýantady. Muny kútpegen edim. Bizdiń brıgada kópultty: onda 37 adam jáne barlyǵy túrli ult ókilderi, – dedi laýreat.
«Erjúrek qutqarýshy» nomınatsııasynda qutqarýshy Maǵarbı Buzyrqaevty atap ótti. Qaraǵandy qalasynyń № 10 órt sóndirý bólimi bastyǵynyń orynbasary turǵyn úılerge jaqyn ornalasqan kásiporynda gaz tsısternasynyń jarylysy kezinde órtti sóndirýge basshylyq etti. Oshaqtan 53 gaz ballony shyǵaryldy. Jedel jáne kásibı áreketterdiń arqasynda adam óliminiń aldyn alý múmkin boldy.
Marapattalǵandar arasynda bilim berý, mádenıet, polıtsııa qyzmetkerleri, Eriktiler lıgasynyń jetekshisi bar.
Mysaly, temirtaýlyq pedagog Vıacheslav Varzın óz qalasynda birinshi bolyp balalarǵa robot tehnıkasyn úıretip, ınformatıkadan avtorlyq baǵdarlama men fızıkadan ǵylymı-ádistemelik keshen ázirledi. Respýblıkalyq jáne halyqaralyq jarystardyń jeńimpazdaryn tárbıeledi.
Á.Saǵynov atyndaǵy Qaraǵandy tehnıkalyq ýnıversıtetiniń 20 jastaǵy stýdenti, bolashaq sáýletshi Arına Bekpaeva mektepten beri volonterlikpen aınalysady.
Rásimge respýblıkanyń túkpir-túkpirinen QHA Aqsaqaldar keńesiniń tóraǵalary, sondaı-aq kórnekti memleket jáne qoǵam qaıratkerleri, atap aıtqanda Sát Toqpaqbaev, Jambyl Artyqbaev, Búrkitbaı Aıaǵan, Etnosaralyq qatynastardy damytý komıtetiniń tóraǵasy Ǵalym Shoıkın keldi.
Saltanatty bólimnen keıin Aqsaqaldar keńesiniń respýblıkalyq otyrysy ótti. Áńgime jastardy tárbıeleýdiń, otbasy ınstıtýtyn nyǵaıtýdyń, dástúrli qundylyqtardyń mańyzy týraly boldy. Qatysýshylar sondaı-aq Qazaqstan halqy Assambleıasynyń Aqsaqaldar keńesi bastamasymen qolǵa alynǵan «Adal azamat» jobasyn talqylady.
Qaraǵandy oblysynda paıdalanylmaı jatqan 46 271 gektar jer memleketke qaıtarylǵanyn jazǵan bolatynbyz.