Assambleıa - tutastyǵymyzdyń tuǵyry
Elbasy Nursultan Nazarbaev buryn-sońdy álemdik tájirıbede bolmaǵan qurylym quryp, oǵan «Qazaqstan halqy Assambleıasy» degen ataý berdi. Biregeı mehanızmniń tarıhyna kóz júgirtsek, alǵashqy onjyldyqtyń ınstıtýtsıonaldyq damýǵa jumsalǵanyn kóremiz.
Al 2007 jyly júrgizilgen konstıtýtsııalyq reforma nátıjesinde Qazaqstan halqy Assambleıasy (QHA) erekshe mártebege ıe bolyp, Parlament arqyly ultaralyq qatynastardyń mehanızmderin nyǵaıtý úshin, Májiliste 9 depýtat taǵaıyndaýǵa múmkindik aldy.
Kóp uzamaı bul ózgeristerdiń sońynan «Qazaqstan halqy Assambleıasy týraly» zań qabyldandy.
Al «Qazaqstannyń-2050» Strategııasy qabyldanǵannan keıin, Assambleıanyń damýynyń jańa kezeńi bastaldy.
Memleket basshysy «Qazaqstan-2050» Strategııasy: bir halyq - bir el - bir taǵdyr» degen ataýmen ótken QHA-nyń 20-shy sessııasynda: «Jańa jaǵdaılarda Assambleıa naǵyz jalpyazamattyq, saıasatústilik jáne jalpyhalyqtyq ınstıtýt bolýy tıis» dep atap kórsetti.
Nursultan Nazarbaev Assambleıanyń 21-shi ǵasyrdaǵy mıssııasy tarylyp emes, keńeıip kele jatqanyna ekpin túsirdi.
«Keıbireýler «eskishe» QHA - bul etnostyq azshylyqtyń ókildigi dep oılaıdy. Men túsinbeıtinderge nemese túsingisi kelmeıtinderge búginde Assambleıanyń ne ekenin aıtqym keledi.
Assambleıa - búkilhalyqtyq ókildik! Sondyqtan da Assambleıaǵa ózim jetekshilik etemin! Sondyqtan da dál búgin Assambleıa - bul barlyq 17 mıllıondyq qazaqstandyq dedim!»,- dep málimdedi Elbasy.
Nursultan Nazarbaev elimizdegi turaqtylyq pen dostyqty saqtaý árbir qazaqstandyqtyń abyroıly mindeti ekenin jıi-jıi aıtyp júr. «Lıvııada qazir ártúrli qaýym arasynda soǵys júrip jatyr. Memleketti joq dese de bolady. Mysyrda da bir aǵym ókilderi men ekinshi aǵym ókilderi soǵysyp jatyr. Bul elde kún saıyn 50-60 adam kóz jumady. Azamattyq soǵystyń tabyldyryǵynda turǵan Sırııada da qoǵam alaı-dúleı.
Óıtkeni, bul elderde aýyzbirlik pen ózara túsinistik joq. Al Ýkraınada bılik basyna kelgen jańa basshylar «biz halyqtyń bir bóligin azamattyqtan aıyryp, orys tilinde sóıleýge shekteý qoıamyz» deıdi. Bizdiń elde mundaıdy kózge elestete de almaısyń.
Qazaqstanda barlyǵy da bar: jerimiz de, onyń qoınaýyndaǵy baılyǵymyz da. Eń bastysy, halqymyzben birge bolsaq, bolashaqqa senimmen qaraı alamyz» dedi Nursultan Nazarbaev Parlamentte depýtattar Kárim Másimovtiń kandıdatýrasyn maquldaǵannan keıin.
«Qazaqstan-2050» Strategııasynda «jańa qazaqstandyq patrıotızm» degen termın bekerden beker paıda bolǵan joq. «Qazaqstandyq patrıotızmniń irgetasy - bul barlyq azamattardyń teń quqyqtyǵy jáne ortaq Otanymyzdyń ar-namysy jolyndaǵy jalpy jaýapkershiligi» dedi Prezıdent.
Al, jańa qazaqstandyq patrıotızm degendi búgingi jastar qalaı túsinedi? Patrıot bolý úshin, jıylǵan jurttyń aldyna shyǵyp: «Men naǵyz patrıotpyn!» dep aıqaılaýdyń qajeti joq. Ár adam óz eline kishkentaı ǵana isimen paıda keltirgeni jón. Boıynda elsúıgishtik, otansúıgishtik qasıetteri bar kez-kelgen adam patrıot emes pe? Biz kóbine patrıotızmdi jańasha kózqaraspen baǵamdamaı jatamyz. «Patrıotızm - bul seniń týyp-ósken eliń basqalardan jaqsy dep ózińdi sendirý» depti Vıktor Gıýgo. Taýyp aıtylǵan.
Mysaly, elimizdiń dańqyn asyryp, Olımpıadalyq oıyndarda jeńimpaz bolǵandar - naǵyz patrıottar. Solardyń biri - London Olımpıadasynyń chempıony Serik Sápıev BAQ-nyń birine bergen suhbatynda bylaı depti: «Men óz elimniń naǵyz patrıotymyn! Qazir Londonda bilim alyp júrmin, biraq Qazaqstannan eshqandaı elge ketpeımin! Frantsýz bolyp týǵandar - Frantsııada, aǵylshyn bolyp týǵandar - Anglııada, qazaq bolyp týǵandar - Qazaqstanda ómir súrýi kerek. Álemge esimi málim boksshymyz Vasılıı Jırov ta Qazaqstannyń dańqyn asyryp, olımpıada oıyndarynda altynnan alqa taqty. Ol 1996 jyly AQSh-qa qonys aýdardy, biraq elge qaıtyp kelýi de múmkin edi. Meniń oıymsha, shetelderdegi tanymal qazaqtarǵa Qazaqstannyń azamattyǵyn berýge oılanbaýymyz kerek».
Al bizdińshe, táýelsizdik jyldaryndaǵy Qazaqstannyń jetken jetistikterin maqtan ete bilý de - elsúıgishtik. Úsh jyldan keıin Astanada «EKSPO-2017» kórmesi ótedi. Álemdik deńgeıdegi osynaý úlken sharany zor abyroımen ótkizý - bárimizge syn. Shyndap kelgende, bizdiń elsúıgishtik sezimimizdiń synalatyn tusy da osy. Ortaq úıimizdegi turaqtylyq pen tynyshtyqtyń kilti nede ekenin sheteldikterge kórsete bilýimiz kerek. Osyǵan daıynbyz ba?
Qalaı bolǵanda da, Qazaqstannyń qaryshtap damýynyń da, jańa qazaqstandyq patrıotızmniń de túp qazyǵy - el birligi ekenin este ustaǵanymyz jón. Ámirlan Álimjan
