Áskerıler emes: Túrkistan stadıonyna Týdy uqypsyz alyp shyqqandar anyqtaldy

TÚRKІSTAN. QazAqparat – Túrkistanda QR XI jazǵy ýnıversıadanyń resmı ashylýynda sapty saqtamaı Memlekettik týdy alyp júrgen áskerı kıimdi adamdarǵa qatysty túsinik berildi, dep habarlaıdy QazAqparat.

Áleýmettik jelide Túrkistan stadıonynda Tý alyp júrgen áskerılerdiń vıdeosy taralyp jatyr. Sapty saqtamaı, uqypsyz adymdap kele jatqan áskerı kıimdegi 4 adam kópshiliktiń kúlkisin keltirse, áskerı ómirdi kórgen azamattar buǵan ashý bildirýde.

«QR XI jazǵy ýnıversıadasynyń resmı ashylý saltanaty Túrkistan qalasyndaǵy Túrkistan Arena stadıonynynda ótkizilgen bolatyn», - dedi sharany uıymdastyrýshy - Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń baspasóz qyzmetinen.

Baspasóz qyzmetiniń málimetinshe, atalǵan sharada QR Memlekettik týyn alyp júrgen azamattar áskerı qyzmetshiler emes – stýdentter. Sondaı-aq saptyq adymmen júrý kezinde qatty jeldiń saldarynan olardyń júrisi birkelki bolmaǵan.

«Atap óteıik, Túrkistan qalasynda sońǵy 3-4 táýlikte qatty jel soǵyp tur. Stsenarıı boıynsha uzaqtyǵy 150 metrdeı saptyq júrý kezinde, jeldiń óte qatty turýyna baılanysty stýdentter áskerı júristiń tártibin buzýǵa májbúr bolǵan.

Al QR Qorǵanys mınıstrliginiń baspasóz qyzmeti Qarýly Kúshterge, basqa da áskerler men áskerı quralymdarǵa qatysy joq adamdarǵa arnaıy belgileri bar áskerı nysandy kıimdi kııýge qoldanystaǵy zańnamada jol berilmeıtinin atap ótti», - dep málim etti Túrkistan oblysynyń Óńirlik kommýnıkatsııalar qyzmetinen.