Áskerı sherý: Birqatar general parad toptaryn bastap shyqty
ASTANA. KAZINFORM — Uly Jeńistiń 80 jyldyǵyna arnalǵan áskerı sherý kezinde bedeldi ofıtserler parad toptaryn bastap shyqty.
Parad leginiń aldynda Qazaqstan Respýblıkasynyń Memlekettik Týy jelbirep keledi. Memleketimizdiń egemendigi men birtustastyǵynyń basty rámizderiniń biri. Táýelsizdigimiz ben eldigimizdiń negizgi qundylyǵy sanalatyn Kók Týymyz búgingi paradty bastap otyr.
Odan soń saltanatty sherý legteriniń aldynda Jeńis Týy jelbiredi. Jeńis Týy — ar-namys pen dańqtyń sımvoly, aldyńǵy býynnyń janqııarlyq erligi men jankeshti eńbeginiń nyshany, surapyl soǵystyń aıaqtalǵanynyń eń basty belgisi.
Sonymen, elordada bastalǵan áskerı sherýdi Qazaqstan Respýblıkasynyń tuńǵysh Qorǵanys mınıstri, Keńes Odaǵynyń Batyry, Halyq Qaharmany, armııa generaly Saǵadat Nurmaǵambetov atyndaǵy elordalyq áskerı kolledjdiń barabanshy kadetter rotasy bastady. Qarýly kúshterdiń kishi komandalyq quramynyń kadrlaryn daıarlaıtyn kolledjde kadetter men ulandar áskerı salada tehnıkalyq-kásiptik bilim alady. Qazirgi ýaqytta kolledjde 341 kadet pen ulan oqyp júr. Barabanshylardyń saltanatty eseptobyn Ortalyq áskerı orkestr ofıtseri aǵa leıtenant Rústem Raqyshev bastap keledi.
Sherýdiń Uly Jeńistiń 80 jyldyǵyna arnalǵan tarıhı bóliminde «Shpagın» jáne «Maksım» pýlemetterimen qarýlanǵan jaýyngerler shyqty. Soǵys jyldarynda jaýyngerler qolyndaǵy negizgi qarý osy bolatyn.
Kezekti qatarda Qurlyq áskerleri bas qolbasshysy basqarma ofıtserleri saltanatty sherýmen ótti. Paradtyq eseptopty Qurlyq áskerleri bas qolbasshysynyń birinshi orynbasary, II — dárejeli «Dańq» ordeniniń jáne «Jaýyngerlik erligi úshin» medaliniń ıegeri general-maıor Qýanyshbek Úshtaev bastady.
Sonymen qatar, kórermender aldynda Otanymyzdyń áýe shebin qorǵaýshylar sap túzedi. Qazirgi kezde Áýe qorǵanysy kúshteri kez kelgen qıyndyq deńgeıindegi mindetterdi sheshýge qabiletti jáne praktıkalyq sabaqtar men taktıkalyq jattyǵýlarda óziniń joǵary sheberligin rastaıtyn Qarýly kúshterdiń eń mobıldi jáne tehnıkalyq jabdyqtalǵan túri sanalady. Paradtyq topty Áýe shabýylyna qarsy qorǵanys áskerleriniń qolbasshysy, «Jaýyngerlik erligi úshin» medaliniń ıegeri general-maıor Qaırat Daýtov bastap keldi.
Munymen qosa, sherý barysynda Qazaqstan Respýblıkasy Qarýly kúshteri Áskerı-teńiz kúshteriniń paradtyq eseptoby sap túzep ótti. Pada legin Áskerı-teńiz kúshteriniń bas qolbasshysy, II dárejeli «Aıbyn» jáne «Dańq» ordenderiniń ıegeri general-maıor Serik Borambaev bastady.
Sherýdi Arnaıy operatsııalar kúshteriniń paradtyq qatary jalǵastyrdy. Bul qurylym tótenshe jaǵdaılardaǵy kúrdeli tapsyrmalardy oryndaý úshin qurylǵan. Árbir jaýynger kez kelgen tapsyrmany tez, iri ýaqtyly oryndaýǵa daıyn. Saltanatty eseptopty Arnaıy operatsııalar kúshteriniń qolbasshysy II dárejeli «Aıbyn» ordeniniń ıegeri polkovnık Aıdos Myrzahmetov bastap keldi.
Saltanatty sherý kezinde alańǵa Desanttyq-shabýyldaý áskerleriniń paradtyq toby shyqty. Olardyń árqaısysy eń qatal daıyndyqtan ótken jáne kez kelgen tótenshe jaǵdaıda áreket etýge daıyn. Topty Desanttyq-shabýyldaý áskerleriniń qolbasshysy, II dárejeli «Aıbyn» jáne «Dańq» ordenderiniń ıegeri, general-maıor Almaz Jumakeev bastady.
Budan buryn habarlanǵandaı, elordadaǵy «Qazaq Eli» alańynda Memleket basshysy — Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad ótip jatyr.