Áskerı oqý oryndaryna qujat qabyldaý merzimi jarııalandy
ASTANA. KAZINFORM – QR Qorǵanys mınıstrligi Áskerı bilim jáne ǵylym departamentiniń bastyǵy Jumabek Ahmetov elimizdegi áskerı joǵary oqý oryndaryna túsi tártibin túsindirdi. Bul rette merzimdi áskerı qyzmettegi azamattar áskerı ınstıtýttarǵa UBT tapsyrmaı-aq túse alady.
QR Qorǵanys mınıstrliginiń áskerı bilim berý júıesine 9 áskerı oqý orny kiredi. Orta bilim boıynsha 3 respýblıkalyq «Jas ulan» mektebi, Astana men Şýche qalalarynda 2 tehnıkalyq jáne kásiptik áskerı kolledj bar.
Joǵary bilimde – Qurlyq áskerleriniń áskerı ınstıtýty, Áýe qorǵanys kúshteri áskerı ınstıtýty jáne Radıoelektronıka jáne baılanys áskerı-ınjenerlik ınstıtýty mamandardy daıarlaıdy. Al joǵary oqý ornynan keıingi (magıstratýra jáne doktorantýra) bilimde – Ulttyq qorǵanys ýnıversıteti bar.
«2024 jyly áskerı ınstıtýttarǵa túsý úshin UBT nátıjeleriniń talaptaryna tıisti ózgerister engizildi: eń tómengi ótý baly – 50, beıindi pánder boıynsha da ózgeris joq – 7 ball, QR Ǵylym jáne joǵary bilim mınıstrligi bıyl Matematıkalyq saýattylyq pen Oqý saýattylyǵy boıynsha suraqtar sanyn 20-dan 10 ballǵa deıin tómendetkendikten, oqý men jazý saýattylyǵy 5-ten 3 ballǵa deıin túsirdik», - dedi J. Ahmetov Ortalyq kommýnıkatsııalar qyzmetinde ótken baspasóz máslıhatynda.
Spıker merzimdi áskerı qyzmettegi azamattarǵa áskerı ınstıtýttarǵa túsý emtıhandarynsyz jáne UBT tapsyrmaı túsý múmkindigi qarastyrylǵanyn atap ótti. Oqýǵa túsý kvotasy jalpy qabyldaý josparynyń 25% quraıdy.
Jergilikti áskerı basqarý organdarynyń qujat qabyldaý merzimi 10 maýsymǵa deıin uzartyldy, qujattardy áskerı ınstıtýtqa tapsyrý merzimi – oqýǵa túsken jyldyń 15-31 shilde aralyǵynda bolmaq.
Azamattar men áskerı qyzmetshilerdi áskerı ınstıtýttarǵa qabyldaý 1-20 tamyz aralyǵynda birneshe kezeńmen júrgiziledi: I kezeń – kásibı-psıhologııalyq irikteý; II kezeń – áskerı-dárigerlik saraptamany júrgizý erejelerine sáıkes qorytyndy medıtsınalyq tekserý; III kezeń – dene daıyndyǵyn tekserý; IV kezeń – konkýrstyq irikteý jáne tirkeý.
Qabyldaý komıssııasynyń sheshimi 21 tamyzda saǵat 10:00-ge deıin jarııalanady jáne áskerı ınstıtýttyń ınternet-resýrsynda ornalastyrylady. Apellıatsııalyq shaǵymdar 22 tamyz saǵat 10:00-ge deıin qabyldanady.
Qabyldaý komıssııasynyń qabyldaý týraly sheshimi áskerı ınstıtýt bastyǵynyń buıryǵymen qabyldanǵan jyldyń 23 tamyzynda bekitiledi.
