«Áskerı qurylys» AQ eks-vıtse-prezıdenti sottaldy

ASTANA. KAZINFORM – Áskerı sottyń qylmystyq ister jónindegi sot alqasy «Áskerı qurylys» AQ áskerlerdi kvartaldaý bas basqarmasynyń laýazymdy tulǵalaryna, avtorlyq, tehnıkalyq qadaǵalaý ókilderine jáne basqa da tulǵalarǵa qatysty úkimdi jarııalady. 

Bul týraly jýrnalısterge arnalǵan brıfıngide Antıkordyń resmı ókili Danııar Bıǵaıdarov habarlady. 

«Almaty oblysy Saryózek garnızonynyń áskerı qalashyǵyndaǵy káriz-tazartý qurylystaryn kúrdeli jóndeýge bólingen 491,6 mln teńge jymqyrǵany úshin «Áskerı qurylys» AQ eks-vıtse-prezıdenti A. Temirbaev, ýchaske bastyǵy T. Kabýltaev, kompanııa basshysy E. Ibragımova, Avtorlyq jáne tehnıkalyq qadaǵalaý ókilderi A. Doşanov jáne D. Shaıpranov, qosalqy merdigerlik uıymnyń basshysy Ǵ. Gazezov jáne onyń senimdi ókili A. Omarov kináli dep tanyldy», - dedi Danııar Bıǵaıdarov. 

Onyń aıtýynsha, kinálilerdiń múlki tárkilenip, memlekettik satyp alýǵa baılanysty qyzmetpen aınalysýǵa 7 jyl merzimge tyıym salynyp, 7 jylǵa bas bostandyǵynan aıyrylǵan. 

Al, ÁJBB bastyǵynyń birinshi orynbasary B. Ábdirahmanov, kúrdeli qurylys basqarmasynyń bastyǵy Q. Onlabaev jáne sol basqarmanyń ofıtseri B. Lesbaev nemquraılyq tanytqany úshin kináli dep tanylyp otyr. 

Úkim zańdy kúshine endi.

Esterińizge salsaq, buǵan deıin «Áskerı qurylys» AQ prezıdenti sottalǵan bolatyn.