Áskerı qyzmetshiler soǵys ardagerin 101 jasqa kelýimen quttyqtady

Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary men Almaty qalasy Almaly aýdany qorǵanys isteri jónindegi basqarmasynyń ókilderi soǵys ardageri Zulharnaı Seıitovti 101 jasqa tolǵan týǵan kúnimen quttyqtady, dep habarlaıdy Kazinform.

Stalıngrad shaıqasynda qan tókken qart maıdanger Belorýs pen Polshany jaýdan azat etken. Berlınge jetip, Potsdam kóshelerin mınadan tazartýǵa qatysqan.

Qonaqtarǵa rızashylyǵyn bildirgen týǵan kún ıesi jastarǵa aq batasyn berdi.

– Bizdi umytpaǵandaryńa rahmet. Egde jastaǵy adamdar úshin mundaı kezdesýler – mereke. Elimizdiń gúldenýin, qazaqstandyqtardyń beıbitshilik pen kelisimde ómir súrýin armandaımyn. Al bolashaq ofıtserlerge general bolyp, Otanymyzdyń ıgiligi úshin qyzmet etýdi tileımin, - dedi Zulharnaı Seıitov.

Ardager 1922 jyly 27 jeltoqsanda Omby oblysy, Jańa Qypshaq aýylynda dúnıege kelgen. 1942 jyly Qyzyl Armııa qataryna shaqyrylyp, Sverdlovsk oblysyndaǵy Týrınsk qalasyna áskerı is boıynsha oqýǵa jiberiledi. Sol jyly ol Lenıngrad maıdanyna attanyp, onda 2-shi ekpindi armııa quramynda basqynshylarmen shaıqasty. 

Keıinnen saper kýrstary boıynsha arnaıy daıyndyqtan ótedi. Dıversanttar men tártip saqshylarynyń mańyzdy jaýyngerlik jumysyn atqarǵan qyzmettik ıttermen ol Stalıngradtan Belorýs pen Polsha arqyly ótip, Berlınge jasalǵan shabýylǵa qatysady.

Maıdangerdiń jaýyngerlik eńbegi «Qyzyl Juldyz», II dárejeli «Otan soǵysy» ordenderimen, «Stalıngradty qorǵaǵany úshin», «Erligi úshin», «1941-1945 jyldardaǵy Ekinshidúnıejúzilik soǵystaǵy eren eńbegi úshin» medaldarymen marapattalǵan. 

Soǵystan keıin Zulharnaı Seıitov Omby aýyl sharýashylyǵy ınstıtýtyn bitirip, Qazaqstanǵa jiberiledi. Munda ol bıologııa ǵylymdarynyń doktory jáne akademık boldy. Áriptesterimen birge «Qazaq balzamy» jáne «Altynsý» emdik sýsyndaryn ázirleýge qatysty. Qymyz, shubat, bıe jáne túıe sútin qurǵaq daıyndaý tehnologııalaryn jasady.

Eńbek sińirgen ǵylym qaıratkeri Zulharnaı Seıitov – 150-den astam ǵylymı jumystar men monografııalardyń, 14 patent pen 8 avtorlyq kýáliktiń, 10 oqý quralynyń, onyń ishinde qazaq, orys jáne aǵylshyn tilderindegi «Bıohımııa» oqýlyǵynyń avtory. Onyń ázirlemeleri men jańalyqtary búginde medıtsınada da, tamaq ónerkásibinde de keńinen qoldanylady.