Áskerı qyzmetshiler drondardy qurastyrý men basqarýdy úırenip jatyr
ASTANA. KAZINFORM – Ulttyq qorǵanys ýnıversıteti Áskerı-zertteý ınstıtýtynyń bazasynda Qurlyq áskerleri ushqyshsyz avıatsııalyq júıeler operatorlarynyń biliktiligin arttyrýǵa arnalǵan aptalyq kýrs ótip jatyr.
Sabaqty ushqyshsyz avıatsııa salasynda on jyldan astam jumys tájirıbesi bar oqytýshylar men nusqaýshylar júrgizedi.
Qazirgi jaǵdaılarda suranysqa ıe praktıkalyq daıyndyqqa negizgi basymdyq berilgenin aıta ketý kerek.
Kýrs barysynda áskerı qyzmetshiler «Torǵaı-10» qurylǵysyn ushqyshsyz ushý apparatyna bólshektep jınaý daǵdylaryn ıgeredi. Sonymen birge taktıkalyq-tehnıkalyq sıpattamalaryn zerdelep, qaýipsizdik sharalary men ártúrli jaǵdaıda qoldaný erekshelikterin de úırenedi.
Budan bólek, Ulttyq qorǵanys ýnıversıtetiniń ǵylymı qyzmetkerleri ázirlegen «Ara» drondaryn qoldaný boıynsha da praktıkalyq sabaqtar júrgiziledi.
Jeke oqý modýli FPV-drondarǵa arnalǵan. Tyńdaýshylar olardy qurastyrýdy, baǵdarlamalaýdy, dıagnostıkalaýdy jáne aqaýlardy joıýdy úırenip shyǵady.
– Biz qoldanbaly daǵdylarǵa basymdyq beremiz. Bizdiń maqsatymyz – alǵan bilimderin óz bólimshelerinde tarata alatyn mamandardy daıarlaý, – dep atap ótti QR UQÝ Qarý-jaraq jáne áskerı tehnıka ǵylymı-zertteý ınstıtýty zertteý qyzmetiniń bastyǵy polkovnık Jarqyn Qabdolda.
Ushqyshsyz avıatsııalyq júıelerdi qoldaný jeke quramnyń qaýipsizdigin arttyryp, jaýyngerlik tapsyrmalardy oryndaýdyń tıimdiligin joǵarylatady, dáldikti, jedel barlaýdy jáne qarsylasqa qashyqtan áser etýdi qamtamasyz etedi.
– Ushqyshsyz ushý apparattary taktıkalyq basymdyqtyń negizgi elementine aınaldy. Olardy qoldaný formalary men tásilderiniń evolıýtsııasy qazirgi zamanǵy urys qımyldarynyń sıpatyna eleýli túrde áser etýde, – deıdi ınstıtýttyń Zertteý qyzmetiniń bastyǵy polkovnık Alekseı Boıko.
Ushqyshsyz júıelerdi basqarý mamandaryn daıarlaý Qarýly kúshterdiń basty basymdyqtarynyń biri bolyp qala beredi. Onyń júzege asyrylýy jeke quramnyń tehnıkalyq biliktiliginiń ósýine jáne ushqyshsyz tehnologııalardy qoldaný múmkindikteriniń keńeıýine yqpal etedi.
Buǵan deıin Saǵadat Nurmaǵambetov atyndaǵy Qurlyq áskerleri áskerı ınstıtýtynyń bazasynda UUA mamandaryn daıarlaıtyn áskerı mekteptiń ashylǵany, sondaı-aq Desanttyq-shabýyldaý áskerlerinde ushqyshsyz apparattardy qurastyrý, synaqtan ótkizý jáne olardy bólimshelerge berý boıynsha jumystardyń tolyq tsıkli jolǵa qoıylǵany habarlanǵan bolatyn.
Aıta ketelik bıyl 850-den astam zapastaǵy ofıtser áskerı qyzmetke shaqyrylady.