Áskerı bólimshelerge JI beınebaqylaý júıesin engizý bastaldy
ASTANA. KAZINFORM — QR Qorǵanys mınıstriniń orynbasary Darhan Ahmedıev el aýmaǵyndaǵy áskerı bólimshelerge jasandy ıntellekt beınebaqylaý júıesin engizý jumysyna túsinik berdi.
— Jasandy ıntellekt arqyly basqarylatyn bul kameralar áskerdegi zańsyz áreketterge tosqaýyl qoıatynyna naqty senemin. Qazir bul jumys qarqyndy júrip jatyr. Osy baǵytta konkýrstyq rásimderdi ótkizip jatyr. Alaıda osy rásimderdi kútpeı, keıbir áskerı bólimshelerde atalǵan beınekameralar ornatyldy. Oǵan jasandy ıntellekt elementteri engizildi. Sondyqtan kameralar ornatylǵan oryndarda zańsyz áreketter bolmaýy tıis, — dedi Darhan Ahmedıev Parlament Májilisinde tilshiler suraǵyna jaýap bere otyryp.
Onyń aıtýynsha, jańa júıe áskerı bólimge kimder kelgenin, bólimshe aýmaǵynda neshe adam júrgenin eseptep otyrady. Sondaı-aq adamdar toptalyp jınala bastasa, jaýapty adamdar negizsiz ornynan ketip qalsa, osy kameralar kezekshilerge belgi beredi. Munymen qosa, áskerı tehnıka da osy kameralar arqyly baqylaýda bolady.
— Qazir úsh áskerı bólimshede mundaı jańa júıe iske qosyldy. Jyldyń sońyna deıin 105 bólimshege ornatamyz. Osy is-sharalardyń barlyǵyna qarajat bólindi, — dedi mınıstrdiń orynbasary.
Budan buryn Qazaqstan áskerindegi zańsyz áreketterdi anyqtaý úshin beınebaqylaý júıesi jańartylatynyn jazǵan edik. Beınebaqylaý kameralary jasandy ıntellekt arqyly basqarylady.
