Áskerı bıletti onlaın alýǵa bolady

ASTANA. QazAqparat – 1 naýryzynan bastap qazaqstandyqtar tolyp jatqan anyqtamalar men qujattardy usynbaı, áskerı qyzmetti ótkerý týraly óz mártebesin bir júıeden bile alady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jelidegi paraqşasynda jazdy, dep habarlaıdy QazAqparat.

«Birneshe aı buryn elordalyq áskerı komıssarıattardyń birine baryp, Qorǵanys mınıstrliginiń ókilderimen birge osy salany tsıfrlandyrý josparlaryn talqylaǵan bolatynbyz. Sonda kóterilgen máselelerdiń biri- áskerge shaqyrylatyn jastardy áskerı qyzmetke shaqyrýdan bosatý nemese keıinge qaldyrý maqsatynda talap etiletin anyqtamalardan aryltý bolatyn. Ol úshin birneshe júıeni biriktirý qajet edi. Araǵa ýaqyt salyp, birlesken jumystyń arqasynda nátıjege qol jetkizdik. Máselen, osy jyldyń 1 naýryzynan bastap azamattar tolyp jatqan anyqtamalar men qujattardy usynbaı, áskerı qyzmetti ótkerý týraly óz mártebesin bir júıeden bile alady», - dep jazdy mınıstr.

«Ulttyq aqparattyq tehnologııalar» AQ jáne Qorǵanys mınıstrligimen birlesip, qazaqstandyqtardy áskerge shaqyrýdan bosatý jáne keıinge qaldyrý týraly aqparat beretin proaktıvti memlekettik qyzmetti iske qosty.

«Áskerge barýǵa mindetti er adamdarǵa, ıaǵnı 18-27 jastaǵy azamattarǵa áskerden bosatý nemese keıinge qaldyrý boıynsha tıisti aqparat telefondaryna habarlama retinde joldanatyn bolady. Mobıldi azamattar bazasynda tirkelgen qazaqstandyqtar ǵana habarlama alatynyn atap ótemin. Qazirgi kúni 300 myń áskerge shaqyrylýshy 1414-ten ЅMЅ habarlamalar alyp úlgerdi», - dep tolyqtyrdy B.Mýsın.