«Áskerı baspana» baǵdarlamasyna qujat qabyldaý bastaldy
Baǵdarlamanyń birinshi aıynda lımıt boıynsha 700-den astam áskerı qyzmetshiniń ótinimi qabyldandy, endigi ótinimder kelesi aıda qabyldanady.
«Otbasy bank» turǵyn úı qurylys jınaq banki» AQ-da «Áskerı qyzmetshiler men arnaýly memlekettik organdar qyzmetkerlerin turǵyn úımen qamtamasyz etý» baǵdarlamasy («Áskerı baspana») boıynsha nesıe berýdi bastady. Baǵdarlamaǵa turǵyn úı tólemderin alatyn, Otbasy bankinde arnaıy aǵymdaǵy shoty bar jáne buǵan deıin turǵyn úı tólemderin jyljymaıtyn múlik satyp alýǵa paıdalanbaǵan kez kelgen azamat qatysa alady», - dep jazylǵan bank habarlamasynda.
Baǵdarlama boıynsha nesıe alý sharttary ózgerissiz qaldy: alǵashqy/ekinshi naryqtan baspana satyp alý jáne jóndeý, alǵashqy jarna 15% -dan bastalady, paıyzdyq mólsherlemesi – 8%, jyldyq tıimdi syıaqy mólsherlemesi 8,3%-dan bastalady. Nesıe merzimi 25 jylǵa deıin sozylady.
«Baspana tańdaýda eshqandaı shekteý joq. Nesıeni jańa nemese qoldanystaǵy turǵyn úıdi satyp alý úshin paıdalanýǵa bolady. Sondaı-aq, menshiktegi turǵyn úıdiń bolýyna qatysty da shekteýler qoıylmaǵan. Nesıeniń ruqsat etilgen eń joǵarǵy somasyn klıent tańdaýymen eki nusqada esepteýge bolady: aı saıynǵy turǵyn úıdiń tólemderi men 15%-dan kem túspeıtin depozıtindegi jınaq somasyna súıene otyryp nemese klıenttiń naqty kirisi men shyǵyndaryna negizdelýge bolady», - deıdi bank.
«Áskerı baspana» baǵdarlamasy boıynsha nesıe alý úshin, úsh qadamdy oryndaý qajet:
1) Internet-bankıngte qatysýǵa ótinish berý (veb-nusqasy https://online.hcsbk.kz );
2) Turǵyn úı tabý;
3) Internet-bankıngte ótinim qabyldanǵannan keıingi 60 kún ishinde bank bólimshesine baryp, nesıe alýǵa ótinish berý.
Joldanǵan ótinimderdi (ınternet-bankıngte) bank vedomstvo men aımaqtarǵa bólmeı, belgilengen lımıt sheńberinde aı saıyn qabyldap otyrady. Eger turǵyn úı tólemderin alýshy osy aıda qatysýǵa ótinim berip úlgermese, ony kelesi aıda joldaı alady. Internet-bankıngke jiberilgen ótinim onyń merzimi aıaqtalǵansha, ıaǵnı 60 kún boıy joıylmaıdy. Osy ýaqyt aralyǵynda turǵyn úı tólemderin alýshy baspana taýyp, nesıe alýǵa ótinish berip úlgermese, qujat kúshin joıady. Bul jaǵdaıda turǵyn úı tólemderin alýshy ony bankke qaıta joldaı alady.
«2020 jyly turǵyn úı tólemderin alyp, ony «Otbasy bankinde» úı alamyz dep jınap júrgen 2 362 qazaqstandyq áskerı qyzmetshi men arnaýly memlekettik organdar qyzmetkerleri «Áskerı baspana» baǵdarlamasy boıynsha jeńildetilgen sharttarmen jalpy somasy 51,8 mlrd teńgege nesıe rásimdedi. Olardyń ishinde 1900-ge jýyǵy 15%-dyq alǵashqy jarnamen, jyldyq 8%-ben turǵyn úı zaımyn aldy», -deıdi «Otbasy bank» AQ Basqarma tóraıymy Lázzat Ibragımova.
«Áskerı baspana» baǵdarlamasyna ótinim berý úshin «Otbasy bank» ınternet-bankınginde jeke kabınetke kirip, sol jaq paneldegi «Arnaıy shot» paraqshasyn ashý kerek. Ekranda kórsetilgen «Áskerı baspana» baǵdarlamasyna qatysýǵa ótinim berý» pernesin basyńyz. Paıda bolǵan silteme boıynsha ótip, «Áskerı Baspana» baǵdarlamasynyń sharttarymen tanysyp, bastapqy betke qaıta oralyp, «Ári qaraı» komandasyn oryndaý kerek.
Óz óńirińizdi ári sizge yńǵaıly «Otbasy Bankiniń» bólimshesin tańdap, «Ári qaraı» batyrmasyn basyńyz. Baǵdarlama sharttarymen tanysqanyńyzdy rastaıtyn elektrondy ótinishke qol qoıyńyz. Ol úshin paıda bolǵan terezede belgi qoıyp, «Ári qaraı» batyrmasyn basyńyz. Mobıldi nómirińizge arnaıy kody bar SMS joldanady. Ony uıashyqqa engizip, «Ári qaraı» batyrmasymen kelesi qadamǵa ótińiz. Elektrondyq ótinimmen tanysyp, «Ári qaraı» batyrmasy arqyly ótinim berýdi aıaqtańyz.
Eger bári sátti júzege assa, monıtorǵa nesıe alýǵa ótinish berý úshin bank bólimshesine júgine alatyn merzim (60 kún) kórsetilip, quttyqtaýy bar habarlama keledi. Sondaı-aq ınternet-bankıngtegi jeke kabınetińizdiń basty betinde «Áskerı Baspana» baǵdarlamasy boıynsha nesıe alýǵa úmitker ekenińiz jáne bank bólimshesine júginý qajet ýaqyt aralyǵy kórsetilip turady. Bank bólimshesine barmaı turyp, banktiń www.hcsbk.kz saıty arqyly kezekke onlaın jazylý qajet.
