Áskerge shaqyrý komıssııasynyń qataryna qoǵam ókilderi tartylýy múmkin

KÓKShETAÝ. QazAqparat - Aqmola oblysynda áskerge shaqyrý komıssııasynyń qataryna qoǵam ókilderin  tartý týraly usynys jasaldy, dep habarlaıdy QazAqparat tilshisi Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Baspalınov Aqmola oblysy boıynsha qorǵanys isteri departamenti jáne Kókshetaý qalalyq qorǵanys ister bóliminiń qyzmetkerlerimen kezdesip, áskerı ortada jemqorlyqty aldyn alý jáne shaqyrý komıssııasynyń jumysyn nyǵaıtý máselelerin talqylady.

«Áskerge shaqyrý komıssııasynyń tıimdi jáne kásibı jumysy bul ulttyq qaýipsizdiktiń kepili. Búgingi tańda qazaqstandyqtardy ásker qyzmetine shaqyrý sharasy ashyq jáne taza ótýi tıis. Ol úshin shaqyrý komıssııasynyń quramyna qoǵam ókilderin tartý qajet», dep atap ótti  kezdesýde Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Baspalınov.

Aqmola oblysynyń jemqorlyqqa qarsy is-qımyl boıynsha ulttyq bıýro departamentiniń basshysy Qýanysh Bekbasov naqtyly mysal keltire otyryp, jemqorlyq qylmysy úshin jaýapkershilikke tartylǵan áskerı qyzmetkerler týraly aıtyp berdi.

«Shaqyrý qaǵazyn berýdiń elektrondy júıesin engizý qajet. Bul adamı faktordy azaıtyp, júıeniń tazalyǵyn arttyrady»,- dep túsindirdi Qýanysh Bekbasov.

Kezdesýdi qorytyndylaǵan Aqmola oblysy boıynsha qorǵanys isteri departamentiniń basshysy, podpolkovnık Rýslan Qasymov áskerı ortada usaq quqyqbuzýshylyqty da nazardan tys qaldyrmaýdy jáne qylmystyq iske tótenshe jaǵdaı retinde qaraý qajettigin atap ótti.

«Qorǵanys salasynda jemqorlyq bolmaýy tıis. Baýyrjan Momyshuly aıtqandaı, «Aryńdy nanǵa satpa». Alaıda, ókinishke oraı, elimizdiń qorǵanys kúshterinde mundaı oqıǵa bolyp turady. Bul árıne, áskerı komıssarlardan bastaý alady», - dep qorytyndylady R.Qasymov.