Áskerge shaqyrý qaǵıdasyna taǵy da ózgerister engizildi
ASTANA. KAZINFORM — Kámeletke tolǵan azamattardy áskerı qyzmetke shaqyrýdy uıymdastyrý jáne ótkizý qaǵıdalaryna ózgerister engizildi.
Otan aldyndaǵy boryshyn óteý jasyna jetken azamattardy merzimdi áskerı qyzmetke shaqyrý turǵylyqty jerdegi áskerı basqarý organdarynyń laýazymdy tulǵalary arqyly júrgiziletini naqtylandy. Atap aıtqanda, aýyldarda, kentterde jergilikti atqarýshy organdar arqyly nemese jumys (oqý) ornyndaǵy basshylyqqa qolhat jiberý arqyly júzege asyrylady.
Sondaı-aq, shaqyrý komıssııasy azamattardy merzimdi áskerı qyzmetke shaqyrý jáne olardy Qazaqstan Respýblıkasynyń Qarýly Kúshteriniń, ózge de áskerleri men áskerı quralymdarynyń tıisti túrleri men tekterine bólý týraly sheshim qabyldaý kezinde olardyń mamandyǵy men densaýlyq jaǵdaıyna basymdyq beriledi.
Úkimet qaýlysynda áskerge shaqyrýdyń ekinshi kezeńin ótkizý merzimi belgilendi:
Ekinshi kezeń Qorǵanys isteri jónindegi departamentterdiń jıyn pýnktinde jyl saıyn kóktemde 1 naýryzdan 30 maýsymǵa deıin, sondaı-aq kúzde 1 qyrkúıekten 31 jeltoqsanǵa deıin ótkiziledi.
Buryn ekinshi kezeń 1 naýryzdan kóktemgi shaqyrý komandasyn jóneltý aıaqtalǵanǵa deıin, al kúzgi shaqyrý 1 qyrkúıekten kúzgi shaqyrý komandasyn jóneltý aıaqtalǵanǵa deıin júrgiziletin.
Buıryq 2025 jylǵy 2 tamyzda kúshine enedi.
Aıtta ketsek, Ǵylym jáne joǵary bilim mınıstri Saıasat Nurbek stýdentterdi áskerge kósheden alyp ketýge qatysty jańa sheshim usynǵan edi.
Belgili bolǵandaı 20 myń jigit áskerden qashyp júr.
Eske salaıyq, bıyl 17 shildede Prezıdent áskerı-patrıottyq tárbıe baǵytyndaǵy jumysty kúsheıtýdi kózdeıtin zańǵa qol qoıdy.