Áskerdi jańǵyrtý úshin jasandy ıntellekt júıesine basymdyq berý kerek – Kım Chen Yn
ASTANA. KAZINFORM – Soltústik Koreıanyń jetekshisi Kım Chen Yn 25-26 naýryz kúnderi eldiń ushqyshsyz avıatsııa tehnologııalyq kesheni men radıoelektrondyq barlaý jáne elektrondyq soǵys jónindegi ǵylymı-zertteý komandasynyń jumysyn tekserdi. Bul týraly The Paper aqparattyq portaly habarlady.
Kım Chen Yn atalǵan keshenge qarasty zertteý ınstıtýty men kásiporyndardyń ártúrli ushqyshsyz ushý apparattaryn (UUA) ázirleý jáne óndirý barysymen tanysyp, tıisti fýnktsıonaldy synaqty baqylady.
Agenttiktiń jazýynsha, júrgizilgen synaqtar áralýan strategııalyq nysandar men teńizdegi jáne qurlyqtaǵy jaý áskeriniń qozǵalysyn baqylaýǵa arnalǵan barlaý drondarynyń jańa túrleriniń qabiletin rastady. Sonymen qatar ártúrli taktıkalyq shabýyldardy júzege asyrýǵa arnalǵan kamıkadze drondarynyń soqqy jasaý múmkindigi de kórsetildi.
Kım Chen Yn sondaı-aq jasandy ıntellekt (AI) tehnologııasymen jabdyqtalǵan kamıkadze drondarynyń fýnktsıonaldy synaǵyn baqylady ári áskerı kúshterdi jańǵyrtý barysynda drondar men jasandy ıntellekt júıesin damytýǵa basymdyq berý qajettigin atap ótti. Ol jańadan ázirlengen radıoelektrondyq soqqy berý júıesine rızashylyq bildirgen.
Soltústik Koreıanyń aqparat quraldary jarııalaǵan fotosýretterden elde birneshe túrli kamıkadze drondarynyń ázirlengenin baıqaýǵa bolady. Degenmen qupııalylyqty saqtaý maqsatynda sýretter óńdelip, keı tustary kólegeılengen. Sýretterden belgili bolǵandaı, synaq barysynda bul drondar tankter men dóńgelekti-brondy tehnıkalardyń maketine dálme-dál soqqy jasaǵan.
Sonymen qatar Lianhe Zaobao basylymynyń habarlaýynsha, Soltústik Koreıa alǵash ret radıolokatsııalyq barlaý ushaǵyn resmı túrde tanystyrdy. Bul ushaqtyń jańa múmkindikteri áýe shabýylyna qarsy eskirgen qorǵanys júıesin jaqsartýǵa yqpal etýi yqtımal.
Buǵan deıin sarapshylar spýtnıktik sýretterdi zertteý arqyly Soltústik Koreıa reseılik Il-76 áskerı-kólik ushaǵyn radıolokatsııalyq barlaý maqsatynda jańǵyrtyp jatqanyn boljaǵan bolatyn.
Londondaǵy Halyqaralyq strategııalyq zertteýler ınstıtýty ótken jyldyń qyrkúıek aıynda jarııalaǵan baıandamasynda mundaı ushaq Soltústik Koreıanyń qurlyqtaǵy radıolokatsııalyq júıesin kúsheıtýge kómektesetinin, alaıda bul júıeniń keı sátterde Koreı túbeginiń taýly-qyrly jer bederine baılanysty shekteýge tap bolatynyn atap ótken edi.
Ońtústik Koreıa áskerı vedomstvosynyń málimdeýinshe, bul ushaqtyń naqty jaýyngerlik múmkindigi qazirshe belgisiz. Alaıda, turpaty iri, salmaǵy aýyr bolǵandyqtan, «onyń kózin joıý ońaıǵa túsýi múmkin».