Ásker qataryn 20 myńnan astam azamat tolyqtyrady
ASTANA. KAZINFORM — Ásker qataryn 20 myńnan astam azamat tolyqtyrady. Bul týraly Ortalyq kommýnıkatsııalar qyzmetindegi brıfıngte Qarýly kúshteri Bas shtaby bastyǵynyń orynbasary general-maıor Sáken Júsipov aıtty.
— Prezıdenttiń 2025 jyldyń 13 aqpandaǵy № 782 Jarlyǵyna sáıkes naýryz aıynan bastap jergilikti atqarýshy organ ákimderi orynbasarlarynyń basshylyq etýimen 195 qalalyq jáne aýdandyq áskerge shaqyrý komıssııasy azamattardy kóktemgi merzimdi áskerı qyzmetke shaqyrýǵa kiristi. Maýsym aıynyń otyzyna deıin Qarýly kúshterdiń, basqa da áskerler men áskerı quralymdardyń qataryn áskerge shaqyrýdy keıinge qaldyrýǵa nemese odan bosatýǵa negizi joq, 18-den 27 jasqa deıingi 20 myńnan astam er azamat tolyqtyratyn bolady, — dedi general-maıor.
Onyń atap ótýinshe, Qorǵanys mınıstrligi áskerde quqyqtyq tártiptiń saqtalýyna, áskerı qyzmetshilerdiń ómiri men densaýlyǵyn saqtaýǵa baǵyttalǵan sharalar júıesin jasady. Árbir sarbazdyń ómiri baqylaýda bolady. Oǵan «Sarbazdar analary komıteti» tartyldy.
— Áskerde sarbazdardyń ata-analarymen jáne týystarymen beınebaılanysqa shyǵýyn qamtamasyz etetin «Otbasymen beıneqońyraý» servısi belsendi qoldanylyp jatyr. «ARMIA.KZ.» aqparattyq servısi jumys istep tur. Ol Qarýly kúshterdi tsıfrlandyrý jáne azamattarmen «Ashyq úkimet» qaǵıdaty boıynsha ózara áreket etýdi jaqsartý úshin jasaldy, — dedi Sáken Júsipov.
Qorǵanys mınıstrligi usynǵan málimetke sáıkes, ásker qataryna 20 833 adam tartylady. Onyń ishinde:
Qarýly kúshterge — 10 598 adam;
Ulttyq gvardııaǵa — 7 054 adam;
UQK Shekara qyzmetine — 2 500 adam;
Tótenshe jaǵdaılar mınıstrligine — 391 adam;
Memlekettik kúzet qyzmetine — 290 adam.
Buǵan deıin Memleket basshysy Qasym-Jomart Toqaev Qazaqstan Respýblıkasynyń azamattaryn 2025 jyldyń naýryz-maýsymynda jáne qyrkúıek-jeltoqsanynda merzimdi áskerı qyzmetke kezekti shaqyrý týraly týraly Jarlyqqa qol qoıǵanyn jazǵan edik.