Asqar Jumaǵalıev «tsıfrlyq volonterlerge» úndeý tastady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev jastardy aqparattyq-kommýnıkatsııalyq tehnologııalar baǵytyndaǵy mamandyqtar boıynsha oqýǵa túsýge shaqyrdy, dep habarlaıdy QazAqparat tilshisi.

«Bizdiń elde mektepterdiń bári kompıýtermen qamtylǵan. Sonymen birge eldegi mektepterdiń 94 paıyzy ınternetke qosylǵan. Aqparattyq-kommýnıkatsııalyq tehnologııalar (AKT) baǵyty boıynsha 2019-2020 jyldary joǵary bilimge 19 myń grant bólindi. Ótken jyly Astana IT ýnıversıteti ashyldy. Keleshektiń ekonomıkasy jańa býyndaǵy mamandar aralaspaı, alǵa basa almaıdy. Sol sebepti jastardy osy baǵytta oqýǵa túsýge shaqyramyn. Óıtkeni bul saladaǵy mamandarǵa degen qajettilik kún sanap artyp keledi», - dedi Asqar Jumaǵalıev QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa májilisinde.

Mınıstrdiń aıtýyna qaraǵanda, qazirgi tańda Qazaqstanda aǵa býyn ókilderiniń tsıfrlyq saýattylyǵy artyp keledi.

«Buryn bizdiń ata-analarymyz jastarǵa uqsap tsıfrlyq tehnologııalardy qoldanady degendi elestete almaıtyn edik. Al búgingi kúni el ishindegi tsıfrlyq saýattylyq deńgeıi 80 paıyzǵa jetip qaldy. Bıyl volonterler jyly ekenin eskere otyryp, jastardy aǵa býynǵa osy tehnologııalardy úıretýge shaqyramyn. Aldyńǵy býyn kezinde bárimizdi oqytty, toqytty. Endi biz de qaryzymyzdy qaıtarýymyz kerek. Sol úshin bıyl «Tsıfrlyq volonterler» aktsııasyn ótkizýdi usynamyn», - dedi ol.