Asqar Mamın Eýropa qaıta qurý jáne damý bankiniń prezıdentimen kezdesti
«Qazaqstanda EQDB qyzmeti kezeńinde ekonomıkanyń qarjy, ınfraqurylym, TKSh, energetıka, shaǵyn jáne orta bıznes, aýyl sharýashylyǵy jáne AT sııaqty basym salalarynda jalpy somasy $10 mlrd-tan astam 300-ge jýyq joba qarjylandyryldy. 2021 jyldyń qorytyndysy boıynsha jalpy kólemi $600 mln bolatyn birlesken jobalardy iske asyrý jóninde kelisimderge qol qoıylady», — dedi A. Mamın.
Taraptar bıylǵy naýryzda qol qoıylǵan QR Úkimeti men EQDB arasyndaǵy eldiń turaqty damýy men ósýine járdemdesýge baǵyttalǵan yntymaqtastyqty keńeıtý jónindegi áriptestik týraly negizdemelik kelisimniń iske asyrylý barysyn talqylady. EQDB-nyń ınfraqurylymdy damytýǵa qatysýyn odan ári keńeıtý, Qazaqstannyń energetıkalyq sektoryn dekarbonızatsııalaý baǵdarlamasyn, EQDB-nyń «Jasyl qalalar» jobalaryn iske asyrý, kárizdik tazartý qurylystaryn jańǵyrtý, sondaı-aq shaǵyn jáne orta bıznesti qoldaý máseleleri qaraldy.
Úlken Almaty aınalma avtomobıl jolyn (ÚAAAJ), Almaty qalasyndaǵy S. J. Asfendııarov atyndaǵy aýrýhanany jáne memlekettik-jekeshelik áriptestik sheńberinde densaýlyq saqtaýdyń basqa da obektilerin salý jobalaryna erekshe nazar aýdaryldy.
Kelissóz qorytyndysy boıynsha Almaty qalasynyń áýejaıyn jańǵyrtý jáne keńeıtý, «Qyzylorda – Jezqazǵan» avtomobıl jolyn rekonstrýktsııalaý jobalary boıynsha yntymaqtastyq týraly kelisimderge qol qoıyldy. Kezdesýge Premer-Mınıstrdiń birinshi orynbasary Álıhan Smaıylov, ulttyq ekonomıka mınıstri Áset Erǵalıev, ındýstrııa jáne ınfraqurylymdyq damý mınıstri Beıbit Atamqulov, qarjy mınıstri Erulan Jamaýbaev, ekologııa, geologııa jáne tabıǵı resýrstar mınıstri Serikqalı Brekeshev, densaýlyq saqtaý mınıstri Alekseı Tsoı, energetıka birinshi vıtse-mınıstri Murat Júrebekov qatysty.
