Asqar Mamın EQQDB prezıdentimen birlesken jobalardy iske asyrý máselesin talqylady

NUR-SULTAN. QazAqparat - QR Premer-Mınıstri Asqar Mamın Eýropa qaıta qurý jáne damý bankiniń (EQQDB) prezıdenti Sýma Chakrabartıdi qabyldady, dep habarlaıdy QR Úkimetiniń baspasóz qyzmeti.

«Ótken 27 jyl ishinde EQQDB Qazaqstanǵa salǵan ınvestıtsııalar kólemi qarjy, ınfraqurylym, energetıka, aýyl sharýashylyǵy salalarynda, aqparattyq tehnologııalar men kommýnaldyq qyzmetter sektorlarynda, sondaı-aq shaǵyn jáne orta bıznesti qoldaý boıynsha 271 jobaǵa $9 mlrd-tan asty», — dedi A. Mamın.

2019 jyly QR ónerkásip, kólik, energetıka, aýyl sharýashylyǵy, qarjy jáne basqa da salalarynda $750 mln astam somaǵa 29 jobany iske asyrý týraly kelisimge qol qoıyldy.

Taraptar Qazaqstandaǵy densaýlyq saqtaý ınfraqurylymyn jańǵyrtýdyń keshendi baǵdarlamasyn júzege asyrýǵa EQQDB-nyń aldaǵy qatysýyn talqylady. Atap aıtqanda, EQQDB Qyzylorda, Qostanaı, Taraz, Atyraý, Kókshetaý, Pavlodar, Almaty qalalarynda jańa kóp beıindi aýrýhanalardyń qurylysyn qarjylandyrýǵa qatysýdy josparlap otyr.

A. Mamın men S. Chakrabartı Qazaqstandaǵy memlekettik-jekeshelik áriptestik salasyndaǵy asa iri joba — Úlken Almaty aınalma avtomobıl jolyn iske asyrý máselesin qarastyrdy.

Sonymen qatar turǵyn úı-kommýnaldyq sharýashylyǵy, kólik ınfraqurylymy, jańartylatyn energııa kózderi t. b. salalardaǵy memlekettik-jekeshelik áriptestik jobalaryna zor kóńil bólindi.

Kezdesýge Premer-Mınıstrdiń Birinshi orynbasary – qarjy mınıstri Á. Smaıylov, ulttyq ekonomıka mınıstri R. Dálenov, densaýlyq saqtaý mınıstri E. Birtanov, «Astana» halyqaralyq qarjy ortalyǵynyń basqarýshysy Q. Kelimbetov, QR Qarjy naryǵyn retteý jáne damytý agenttiginiń tóraıymy M. Ábilqasymova jáne ındýstrııa jáne ınfraqurylymdyq damý mınıstriniń orynbasary B. Qamalıev qatysty.