Asyrap alǵan balalaryn qorlaǵan emshiniń 31 jyl buryn adam óltirgeni rastaldy
ShYMKENT. KAZINFORM — Shymkentte qamqorlyǵyna jáne asyrap alǵan balalaryna jaýyzdyq tanytqan emshiniń buǵan deıin adam óltirgeni rastaldy. Sondaı-aq ol psıhıkalyq aýytqýmen esepte turǵan.
Emshi isine qatysty jabyq sot protsesi ótip jatyr.
Sot otyrysyna kelgen qalalyq bilim basqarmasy qorǵanshylyq jáne qamqorshylyq bóliminiń mamany Jadyra Toǵysbekova tilshilerge bergen suhbatynda er kisi bala asyrap almas buryn jubaıy ekeýi bala asyrap alý boıynsha arnaıy kýrstan ótkenin jáne birneshe qujat usynǵanyn aıtty.
Bul qujattar ishinde emshiniń birqatar medıtsınalyq anyqtamada deni saý ekeni, buryn sottalmaǵany kórsetilgen.
Basqarmadaǵylar bıyl mamyrdyń 27-sinde prokýratýraǵa suranys jibergen.
QR Bas prokýratýrasy quqyqtyq statıstıka komıteti «Aqparattyq qyzmet» júıesi jasaǵan qujatta emshiniń 1993 jyly «abaısyzda adam óltirý» babymen isti bolǵany jáne psıhıkalyq aýytqýyna baılanysty qylmystyq is toqtatylyp, ol májbúrlep emdeýge jiberilgeni kórsetilgen.
Aıta keteıik, emshige sot aktisi búgin jarııalanady.
Buǵan deıin Shymkentte jergilikti emshiniń 6 balany qamqorlyqqa alyp, olarǵa ıt pen mysyqtyń etin bergenin, mal baqtyryp, úsh jyldan beri azaptap kelgenin jazǵan bolatynbyz.
Ol qazir arnaıy aýrýhanada jatyr.
Keıinirek emshi týraly tyń derek shyqty. Balalardyń eldiń birneshe qalasynan asyrap alynǵany belgili boldy.
Emshi isinen soń bilim salasynyń birqatar qyzmetkeri jazalandy.
Asyrap alynǵan balalardyń arasynda úsh aılyq egiz de bar.
Balalardyń biriniń ájesi Óskemende turady. Kazinform tilshisi 65 jastaǵy Natalıa Ýstınovamen jolyǵyp, jıen nemeresiniń asyraýǵa qalaı berilgenin surap kórdi.
Al Shymkenttegi balalar úıiniń basshysy emshiden qorlyq kórgen oqýshy týraly aıtyp berdi.
Búginde qoǵamdyq rezonans týǵyzǵan is sotqa kelip tústi.
Birer kún buryn osy balalarǵa qamqorlyq emes, qorlyq kórsetti dep aıyptalyp jatqan emshiniń isin qaraıtyn sýdıa belgili boldy.
Al Oqý-aǵartý mınıstrligi bala quqyqtaryn qorǵaý komıteti shymkenttik emshi aqyl-esi saý degen qujat ótkizgenin málimdedi.
