Asyl tuqymdy mal alýǵa sýbsıdııa normatıvi ulǵaıtylady - AShM
ASTANA. KAZINFORM — QR Aýyl sharýashylyǵy mınıstrligi elimizdegi iri qara sanyna, et óndirý kólemine jáne mal sharýashylyǵyn sýbsıdııalaýǵa qatysty túsinik berdi.
- Bıylǵy 9 aıdyń qorytyndysy boıynsha iri qara sany 8,5 mln-ǵa jetti. Onyń ishinde sıyr - 4,5 mln. Bul byltyrǵy kórsetkishpen salystyrǵanda 2,5 paıyz kóp. Tól alý kólemi edáýir ósip, 2,8 mln basqa jetti (ósim – 17,9%), - delingen mınıstrliktiń Kazinform agenttigine bergen jaýabynda.
Vedomstvonyń aqparatyna qaraǵanda, elde et óndirisin odan ári ulǵaıtýǵa jetkilikti baza bar. Sondyqtan bul jaǵdaı tapshylyq qaýpin boldyrmaıdy.
- Barlyq túrdegi et óndirisi oń dınamıkany saqtap keledi. Osy jylǵy 9 aıdyń qorytyndysy boıynsha óndiris ósimi 102,6 paıyzdy nemese 816,3 myń tonnany qurady (2024 jyly – 795,8 myń tonna). Sonyń ishinde qańtar-qyrkúıek aılarynda 282,3 myń tonna sıyr eti, 88,6 myń tonna qoı eti, 115,4 myń tonna jylqy eti óndirildi, - dep atalyp ótken AShM málimetinde.
Mal sharýashylyǵy salasyn sýbsıdııalaý QR Aýyl sharýashylyǵy mınıstriniń 2019 jylǵy 15 naýryzdaǵy № 108 buıryǵymen bekitilgen «Asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalary» aıasynda jalǵasyp jatyr.
- Qoldanystaǵy sýbsıdııalaý baǵyttary saqtalady jáne belgilengen tártippen júzege asyrylady. Sonymen qatar, mınıstrlik asyl tuqymdy mal satyp alǵan kezde sýbsıdııa normatıvin ulǵaıtyp, qaǵıdalarǵa ózgerister engizip jatyr. Qazirgi kezde buıryq jobasy QR Ádilet mınıstrliginde kelisýde tur. Fermerlerden sýbsıdııalaý Qaǵıdalaryna ózgerister men tolyqtyrýlar engizý jónindegi usynystar kelip túsken jaǵdaıda, olar qoldanystaǵy zańnamaǵa sáıkes qarastyrylyp, negizdelgen qajettilik bolǵan kezde tıisti ózgerister engiziletin bolady, - deıdi AShM mamandary.
Buǵan deıin habarlanǵandaı, Qazaqstannan iri qara mal etin eksporttaý ýaqytsha shekteldi.
Aıta keteıik, 2030 jylǵa qaraı elde iri qara mal sanyn 12 mln-ǵa, usaq mal basyn 30 mln-ǵa jetkizý josparlanǵan.