AsiaCredit Bank salymshylarynyń aqshasy qalaı qaıtarylady

ALMATY. QazAqparat – «AsiaCredit Bank» AQ banktik, ózge operatsııalardy jáne baǵaly qaǵazdar naryǵyndaǵy qyzmetti júrgizýge arnalǵan lıtsenzııadan aıyryldy. Qazaqstannyń depozıtterge kepildik berý qory AsiaCredit Bank salymshylaryna aqsha qalaı qaıtarylatynyn túsindirdi, dep habarlaıdy QazAqparat tilshisi.

«AsiaCredit Bank» AQ jeke tulǵalardyń depozıtterine mindetti kepildik berý júıesiniń qatysýshysy bolyp tabylady, ıaǵnı jeke tulǵalar men dara kásipkerlerdiń salymdarynda, aǵymdaǵy shottary men tólem kartochkalarynda ornalastyrylǵan aqshalaryna «Qazaqstannyń depozıtterge kepildik berý qory» AQ (QDKBQ, Qor) kepildigi qoldanylady.

Agenttik banktiń aktıvteri men mindettemelerin basqa bankke bir mezgilde berý operatsııasyn júrgizýden bas tartqan jaǵdaıda, QDKBQ salymshylarǵa kepildik berilgen ótemdi tóleý sharasyn júzege asyrady. Qor ótem tóleýdi bastaý kúnin zańnamada bekitilgen merzimde habarlaıdy.Tólemderdi júzege asyrý sharasy jaıly resmı habarlama Qor saıtynda jáne buqaralyq aqparat quraldarynda jarııalanǵan kúnnen bastap, 5 jumys kúni ishinde bastalady», - delingen habarlamada.

Eske salamyz, QDKBQ kepildik berilgen ótemdi bank lıtsenzııasynan aıyrylǵan kúnge qaraı eseptelgen syıaqyny eskere otyryp,depozıttegi qaldyq soma sheginde tóleıdi:

- teńgedegi jınaq depozıtter boıynsha – 15 mln teńgeden;

- teńgedegi basqa depozıtter boıynsha – 10 mln teńgeden;

- shetel valıýtasyndaǵy depozıtter boıynsha – valıýta balamasynda 5 mln teńgeden aspaıdy (bank lıtsenzııasynan aıyrylǵan kúni belgilengen valıýta aıyrbastaý baǵamy boıynsha).

Jeke tulǵa nemese dara kásipkerdiń bankte túri men valıýtasy boıynsha eki jáne odan da kóp kepildendirilgen depozıtteri bar bolsa, Qor olar boıynsha 15 mln teńgeden aspaıtyn kólemde kepildik berilgen jıyntyq ótem tóleıdi. Bul rette shetel valıýtasyndaǵy depozıttiń 5 mln teńgeden aspaıtyn kepildendirilgen qaldyǵy boıynsha shekteý eskeriledi.

Kepildik berilgen shekti somadan asatyn depozıtter boıynsha Qor joǵaryda atap kórsetilgenindeı, tek bekitilgen somany ǵana óteıdi.Al ótelmeı qalǵan artyq aqsha boıynsha salymshylar bankti májbúrlep taratý týraly sot sheshimi zańdy kúshine engen soń, banktiń taratý komıssııasyna ótinish bere alady.

QDKBQ salymshylarǵa kepildik berilgen ótemdi tóleý úshin konkýrstyq negizde agent bankti tańdaıdy. Salymshynyń ótinishi boıynsha onyń aqshasy agent banktiń kassasynan qolma-qol aqshamen nemese qoldanystaǵy bank shotyna qolma-qol aqshasyz aýdarý arqyly berilýi múmkin. Salymshy kepildik berilgen ótemdi alý úshin agent bankke barǵan kezde jeke basyn kýálandyratyn kýáligi bolsa jetkilikti. Tolyq nusqaýlyq Qor saıtynda ornalastyrylǵan .

Aıta keteıik,«AsiaCredit Bank» AQ baǵaly qaǵazdar naryǵynda qyzmetti júrgizý lıtsenzııasynan aıyryldy.