AShM, Jambyl jáne Almaty oblysy ákimdikteri eki iri ınvestıtsııalyq jobany iske asyrýdy keshiktirgen
Úkimette QR Premer-Mınıstriniń birinshi orynbasary Roman Sklıardyń tóraǵalyǵymen jańa formatta ótkizilgen Investıtsııalardy tartý jónindegi keńestiń (ınvestıtsııalyq shtab) kezekti otyrysy ótti, dep habarlaıdy Kazinform Úkimettiń baspasóz qyzmetine silteme jasap.
Otyrysty asha otyryp, Roman Sklıar Investıtsııalyq shtab múshelerine Investıtsııalar tartý jónindegi keńes tóraǵasynyń orynbasaryn tanystyrdy. Bul qyzmetke QR Prezıdentiniń ekonomıkalyq máseleler jónindegi kómekshisi Áset Erǵalıev taǵaıyndaldy. Investıtsııa tartý máselesi Memleket basshysynyń erekshe baqylaýynda ekeni atap ótildi.
Otyrystyń kún tártibindegi birinshi másele Investıtsııalyq shtabtyń jumysyn qaıta formattaý boldy. Eske sala keteıik, jeltoqsan aıynyń basynda Memleket basshysy Q. Toqaev Keńeske erekshe ókilettikter beretin «El ekonomıkasyna ınvestıtsııalar tartý jónindegi jumystyń tıimdiligin arttyrý jónindegi sharalar týraly» Jarlyqqa qol qoıdy. Búgingi tańda Úkimet aldynda 2029 jylǵa qaraı ekonomıka kólemin $450 mlrd-qa deıin, ıaǵnı 2 esege deıin ulǵaıtý jóninde mindet tur. Bul kórsetkishke qol jetkizý úshin elge keminde $150 mlrd sheteldik ınvestıtsııa tartý qajet.
Qazaqstanda ınvestorlar úshin qolaıly jaǵdaılar jasaý boıynsha jumys jalǵasýda, normatıvtik-quqyqtyq baza jáne ınvestorlardy qoldaý quraldary jetildirilýde. Alaıda bıznesti alańdatatyn máseleler bar, olardy ortalyq jáne jergilikti memlekettik organdardyń, sondaı-aq kvazımemlekettik sektor nysandarynyń qatysýymen jedel, jiti qadaǵalaý arqyly sheshý qajet.
Osy jumystyń tıimdiligin qamtamasyz etý úshin elde ınvestorlarmen qoldaý jáne ózara is-qımyl boıynsha jedel sheshimder qabyldaý júıesi iske asyrylatyn bolady. Búgingi tańda Investıtsııalyq shtab otandyq jáne sheteldik ınvestorlardyń birqatar naqty keısin qarastyrdy. Bıznes aldynda turǵan problemalyq máseleler men bıýrokratııalyq kedergiler belgili boldy.
Budan basqa qazir respýblıkada naqty jáne júıeli sıpattaǵy kemshilikterdi odan ári anyqtaý úshin barlyq iske asyrylyp jatqan ınvestıtsııalyq jobaǵa tekserý júrgizilip jatyr. Ákimshilik kedergilerdi azaıtý, ruqsat berý qujattaryn kelisý protsesterin jedeldetý jáne t.b. úshin birqatar zańnamalyq aktige ózgerister daıyndalýda.
Otyrys aıasynda Investıtsııalyq shtab hattamalarynyń usynys bildirý sıpatyn ózgertý týraly qaralyp, bekitildi. Endi Keńestiń barlyq sheshimin memlekettik organdar men ulttyq kompanııalar mindetti túrde oryndaýy qajet. Investıtsııalyq shtabtyń tapsyrmalary tıisinshe oryndalmaǵan jaǵdaıda jaýapty tulǵalar, onyń ishinde saıası memlekettik qyzmetshiler jumystan ketýge deıin jaýapqa tartylatyn bolady. Sonymen qatar qoıylǵan mindetterdi oryndamaǵany úshin Keńes músheleriniń de, ortalyq, jergilikti atqarýshy organdar basshylarynyń, kvazımemlekettik sektor nysandarynyń da jaýapkershiligi edáýir artady.
Investıtsııalyq shtab óńdeýshi salada keminde 15 iri jobany iske asyrý máselelerin qarady, olar jańa ósý núktelerine aınalýy jáne eldiń ónerkásiptik negizin qalyptastyrýy tıis. Bolashaqta mýltıplıkatıvti áserge qol jetkizýge múmkindik beretin ShOB-ty tarta otyryp, olardyń aınalasynda aralas salalar men óndiristerdiń tutas ekojúıesin qurý josparlanyp otyr. Qysqa merzimde Keńestiń qaraýynda bolatyn jobalardyń sońǵy tizbesin jasaý tapsyryldy. Tizbe bekitilgennen keıin olardyń árqaısysy boıynsha tıisti is-sharalar josparlaryn qalyptastyrý kerek.
Otyrysqa eki iri ınvestıtsııalyq jobany iske asyrýdyń problemalyq máseleleri shyǵaryldy – quny $98 mln bolatyn Goknur Gida túrik kompanııasynyń organıkalyq shyryndar men ezbe óndirý zaýyty jáne nıderlandtyq Farm Frites kompanııasynyń ($145 mln) frı kartobyn óndirý kásiporny. AShM, Jambyl jáne Almaty oblystarynyń ákimdikteri osy bastamalardy iske asyrýdy keshiktirýge jol bergeni aıtyldy.
Talqylaý qorytyndysy boıynsha tıisti memlekettik jáne jergilikti atqarýshy organdarǵa atalǵan jobalar boıynsha bar problemalyq máseleni qysqa merzimde sheshý tapsyryldy.
