AShM: Shegirtkeniń kesiri egin shyǵymyna áser etpeıdi
ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynan keıin ótken baspasóz máslıhatynda bıyl shegirtkeden egin túsimine eshqandaı zııan kelmeıtinin málim etti.
— Bizde dıagnostıka men boljam jasaıtyn mekeme bar. Byltyr kúzde solar zertteý júrgizip, 2,1 mln gektar alqapty shegirtkege qarsy óńdeý kerektigin aıtqan bolatyn. Onyń ishinde 15-16 oblystaǵy alqaptar boldy. Jumystyq ýaqytynda júrgizdik, memleket tarapynan 7,1 mlrd teńge bólingen bolatyn. Búkil konkýrstar ýaqytynda ótip, preparattar da ýaqytynda satyp alyndy. Jumys jospar boıynsha júrip jatyr. Biraq keıbir adamdar BAQ-qa aqparat tastap jiberip jatyr. Bir jaǵynan ol bizge jaqsy. Der kezinde mán-jaıdy anyqtaýǵa kómektesedi. Qazir 2 mln gektardan astam alqapqa dári sebildi. 400-den astam tehnıka tartylǵan. Oblys ákimderiniń orynbasarlary basqaratyn shtabtar jumys istep tur, — dedi Aıdarbek Saparov.
Mınıstr shegirtke basqany týraly dabyl shyqqan óńirlerdiń halqymen kezdesip qaıtqandaryn aıtty.
— Orynbasarlarym da, ózim de óńirlerdi aralap, halyqpen kezdestik. Bizdiń jergilikti ókilderden ǵana emes, halyqtyń óz aýzynan estidim. Barlyq jaǵdaı turaqty túrde jasalyp jatqanyna kóz jetkizdik. Máseleni baqylaýda ustap otyrmyz. 1 gektar jerge de eshqandaı zııan bolǵan joq. Eginniń shyǵymyna da, shabyndyqtyń túsimine de keri áseri bolmaıdy. Óıtkeni ońtústik jaqta shegirtkege qarsy óńdeý jumystary aıaqtaldy. Soltústiktegi Qostanaı, Aqtóbe jaqtarda jumys kúsheıtilip jatyr. 15-20 shildege qaraı aıaqtalady, — dedi vedomstvo basshysy.
Buǵan deıin Qyrǵyzstanda shegirtkemen kúreste jańa preparat qoldanyla bastaǵanyn jazǵan edik.