AShM apparat basshysy taǵaıyndaldy

ASTANA. KAZINFORM — Aýyl sharýashylyǵy mınıstrliginiń apparat basshysy bolyp Sergeı Lı taǵaıyndaldy, dep habarlaıdy vedomstvonyń baspasóz qyzmeti.

— Aýyl sharýashylyǵy mınıstriniń buıryǵymen, Prezıdent Ákimshiligi men Úkimet Apparatynyń kelisimi boıynsha Aýyl sharýashylyǵy mınıstrliginiń apparat basshysy bolyp Sergeı Lı taǵaıyndaldy, — delingen habarlamada.

Sergeı Mıhaılovıch Lı 1973 jyly dúnıege kelgen. Sankt-Peterbýrgtegi RF ІІM Іshki áskerleriniń joǵary áskerı komandalyq ýchılışesin «quqyqtaný» mamandyǵy boıynsha, sondaı-aq Qazaq-Reseı halyqaralyq ýnıversıtetin «esep jáne aýdıt» mamandyǵy boıynsha támamdaǵan. Zań ǵylymdarynyń kandıdaty.

Eńbek jolyn bank salasynda bastaǵan. «Kazagroprombank» AQ Aqtóbe oblystyq fılıalynda jáne «Kazkommertsbank» AQ Aqtóbe fılıalynda zańger bolyp jumys istegen. Salyq qyzmeti organdarynda qyzmet atqarǵan: bas maman, quqyqtyq qamtamasyz etý bóliminiń bastyǵy, Aqtóbe oblysy salyq departamentiniń quqyqtyq qamtamasyz etý basqarmasynyń bastyǵy, sondaı-aq Aqtóbe qalasynyń salyq basqarmasyn basqarǵan. Aqtóbe oblysy boıynsha sot aktilerin oryndaý departamentin basqarǵan, QR Jeke sot oryndaýshylary respýblıkalyq palatasynyń basqarma tóraǵasy qyzmetin atqarǵan, 2019 jyldyń qyrkúıeginen bastap Aqtóbe qalasy ákiminiń orynbasary, Saýda jáne ıntegratsııa mınıstrliginiń zań qyzmeti departamentiniń dırektory laýazymdaryn atqarǵan. Jańa qyzmetke taǵaıyndalǵanǵa deıin «QazExpoCongress» UK» AQ basqarma tóraǵasynyń orynbasary qyzmetin atqardy.

Osyǵan deıin Qazaqstannyń Mońǵolııadaǵy, Shrı-Lankadaǵy, Shvetsııadaǵy jáne Danııadaǵy elshileri taǵaıyndalǵanyn jazǵanbyz.