Ashat Aımaǵambetov vıdeosabaqtardyń túsirilimine qatysqan muǵalimdermen kezdesti
«Juqtyrý qaýpine, barlyq qıyndyq men tıisti tájirıbeniń joqtyǵyna qaramastan, sizder osy jumyspen aınalysýǵa kelistińizder. Sol úshin sizderge alǵysymdy bildiremin. Syrt kózben qaraǵan adamǵa beınesabaqtardy túsirý ońaı bolyp kórinýi múmkin. 20 jyl tájirıbesi bar muǵalim úshin telesabaq túsirýde qandaı qıyndyq týyndaýy múmkin deıtinder de bar, biraq bul – múldem basqa jumys. Shyn máninde, kamera aldynda sóılegenge qaraǵanda, úırenshikti synypta 25 balanyń aldynda sabaq túsindirý áldeqaıda ońaıyraq», – dedi óz sózinde Ashat Aımaǵambetov kezdesý barysynda.
Jalpy IV toqsanda qazaqstandyq telearnalar arqyly 3 myńnan astam telesabaq kórsetildi. Qazirgi tańda taǵy 15 myń beınesabaq daıyndalǵaly otyr. Olar densaýlyq jaǵdaıyna baılanysty úıde oqıtyn oqýshylar úshin nemese aýa raıynyń qolaısyzdyǵyna baılanysty sabaq toqtatylǵan jaǵdaıda qosymsha materıal retinde paıdalanylady.
«Eldegi epıdemıologııalyq jaǵdaıǵa baılanysty IV toqsan boıy qazaqstandyq oqýshylar qashyqtan bilim alýǵa májbúr boldy. 16 naýryzda oqý jylyn aıaqtaý týraly usynystar kóp boldy. Oqýshylardy shilde aıyna deıin uzaq demalysqa jiberýdi, al oqý protsesin jazdyń sońyna qaraı jalǵastyryp, kelesi oqý jylyn birden bastap ketý boıynsha da usynystar kelip tústi. Degenmen biz oqýdy toqtatpaýǵa jáne ony qashyqtan oqytý formatynda jalǵastyrýǵa sheshim qabyldadyq. Biz tehnıkalyq múmkindikterge, halyqaralyq tájirıbeni zerdeleýge súıene otyryp, belgili bir strategııany tańdadyq. Bul oqytý formatyna amalsyzdan kóshtik», – dep atap ótti Ashat Aımaǵambetov.
QR BǴM basshysy eger epıdemıologııalyq jaǵdaı jaqsarsa 1 qyrkúıekte mektepter dástúrli oqytý formatyna oralatynyn aıtty. Alaıda kez kelgen jaǵdaıǵa daıyn bolý qajet.
«Maqsatqa jetýde komandalyq jumystyń mańyzy zor. Biz – Bilim jáne ǵylym mınıstrinen bastap qatardaǵy muǵalimge deıin bir komanda bolyp kettik. Túsirilimniń alǵashqy kúni Ashat Qanatuly stýdııaǵa keldi de, kameranyń aldynda qobaljyp turǵan bizge qoldaý bildirdi. Mine, búgin biz osy úlken istiń nátıjesin kórsetip otyrmyz. Ótkenge kóz júgirtsek, Qazaqstanda qashyqtan bilim berýdiń negizi jańadan qalandy dep aıtýǵa bolady. Endi bir komanda bolyp birge damytatyn jáne ári qaraı júzege asyratyn keremet dúnıeniń irgetasy qalandy. Bizge senim artqanyńyz úshin raqmet», – dep pedagog Natalıa Orehova mınıstrge alǵysyn bildirdi.
Onlaın-kezdesý barysynda Bilim jáne ǵylym mınıstri birqatar pedagogti qurmet gramotasymen, «Y.Altynsarın» jáne «Bilim berý salasynyń qurmetti qyzmetkeri» qurmet belgilerimen marapattady.
Sondaı-aq, Ashat Aımaǵambetov pedagogterdi qajetsiz esep berý men ózderine tán emes mindetterden bosatatyn buıryqqa qol qoıǵan bolatyn.
