Ashat Aımaǵambetov: «Oqýlyq - qosymsha qural» degenge kelispeımin

NUR-SULTAN. QazAqparat - Aldaǵy ýaqytta basylyp shyǵatyn mektep oqýlyqtary múldem jańa sapada bolady. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Oqýlyqtar máselesi óte mańyzdy. Bul baıaǵydan kele jatqan, halyqtyń kókeıinde júrgen eń basty máseleniń biri. Bizde keıbir áriptesterimiz «oqýlyq - qosymsha qural» dep aıtady. Men onymen kelispeıtindigimdi árqashan da aıtamyn. Oqýlyq bala úshin eń negizgi quraldyń biri. Bala oqýlyqqa súıenip oqıdy. Oqýlyqta bolǵan aqparatty boıyna sińiredi. Sondyqtan oqýlyqqa biz óte úlken nazar aýdaryp jatyrmyz. Biz oqýlyqtyń jalpy daıyndalý protsesin ózgerttik. Jalpy, avtorlardy alyp, bul solardyń ǵana problemasy desek durys emes. Ne baspalardyń problemasy dep, baspaǵa aýdarsaq ta durys bolmaıdy. Qoǵamda sondaı oı qalyptasqan. Biz mınıstrlik retinde jaýapkershilikti ózimizge alýymyz kerek. Óıtkeni, jalpy osy saıasatty júrgizip otyrǵan mınıstrlik. Árıne, bul jerde baspalardyń, avtorlardyń jibergen qatelikter bar. Biraq, negizinde osy saıasatty Bilim jáne ǵylym mınıstrligi júrgizip otyr. Sondyqtan biz osy saıasatty kúrt ózgerttik», - dedi mınıstr Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Onyń aıtynsha, kitap daıyndaý barysynda eń aldymen baǵdarlamalardyń durys bolýyna basa mán beriledi. Sodan keıin ǵana saraptama jasalyp baryp oqýlyqqa engiziletin bolady.

«Saraptamaǵa muǵalimdi 7 kúnge shaqyryp, qanshama kitapqa saraptama jasa degen kezde onyń esh tıimdiligi bolmaıdy. Óıtkeni, jaqsy muǵalim kitapqa saraptama jasaıtyn jaqsy maman degen sóz emes. Oqýlyqtaný degen bólek ǵylym. Onyń ózindik zańdylyqtary bar. Jalpy bıyl biz oqýlyqtarǵa qatysty jańa ereje qabyldadyq. Endi budan keıin shyǵatyn oqýlyqtar basqa sapada jaryq kóredi», - dedi Ashat Aımaǵambetov.