Ashat Aımaǵambetov mektepterde «qulypsyz» kitaphana ashýdy tapsyrdy

ASTANA. QazAqparat – Gajdetter zamanyn kitap zamanyna aınaldyrý úshin mektepterdiń bazasynda «qulypsyz» kitaphanalar ashylýy kerek. Bul ásirese úıinde sabaq oqýǵa jaǵdaıy joq balalr úshin taptyrmas kómek.

QR Oqý-aǵartý mınıstri Ashat Aımaǵambetov vedomstvonyń apparat jınalysynda óńirlerge osyndaı tapsyrma berdi, dep habarlaıdy QazAqparat tilshisi.

«Balalar kitap oqysyn desek, ár mektepte olarǵa qyzyqty, zamanaýı, dúnıejúzi oqıtyn kórkem ádebıet, ásirese, qazaq tilinde qoljetimdi bolýy kerek. Osy maqsatqa qol jetkize almaı otyryp, qaıdaǵy tárbıe jumysy, qaıdaǵy bilim berý sapasy týraly aıtasyzdar? Ár túrli sharmen is-shara ótkizgennen úlken nátıje bolmaıdy. Osyny qashan túsinesizder? Tárbıe jumysy degen – osy kitapqa baýlý, durys tábıelik mańyzy bar kórkem ádebıetti usyný. Osy arqyly naqty tárbıe jumysy júrgiziledi. Balalardyń kózi ashyq, kókiregi oıaý bolýy úshin sapaly kitap usynyp, tıisti jaǵdaı jasaýymyz kerek. Biraq sizder bul jumysty isteı almaı otyrsyzdar», - dedi vedomstvo basshysy.

Jıynda Qyzylorda oblysynyń mektepterdi kórkem ádebıetpen qamtýǵa ekinshi jyl qatarynan mardymdy qarajat bólmeı otyrǵany aıtylǵan bolatyn.

«Bul taqyryp kún tártibinen túspeıdi. Balalar kitap oqýy kerek. Qazir gadjetter zamany. Ár túrli ınternet, basqa da táýekelder kóp. Osy gadjetter zamanyn biz kitap zamanyna aınaldyrýymyz kerek. Gadjetter arqyly oqysa da, qaǵaz kúıinde oqysa da, áıteýir kitap oqýy kerek. Ol ony jaı mantra sııaqty «kitap oqý kerek» dep urandata bermeı, naqty is-sharalar arqyly uıymdastyrý kerek. Kitap bolmasa, nesin oqıdy? Báriniń kitapty úıine satyp alatyndaı múmkindigi bola bermeıdi. Sol úshin mekteptegi kitaphanalar tıisti formatqa aýystyrylýy kerek. Kitaphana jabyq turmaýy kerek. Tańerteń kelip ashyp, keshke jabatyn jumys tásili ózgerýi kerek. Ashyq reakratsııalarda, býkkrossıngi bar, basqasy bar, kitaptardy qoljetimdi etip, ashyq qoıyp, qosymsha kitaphanalar ashýdy da tapsyramyn. Óıtkeni keıbir balalardyń úıinde kitap oqymaq túgil, kúndelikti sabaq oqýǵa qajetti jaǵdaı joq. Sonda ol balalar mektepke kelip, sóreden kitapty erkin alyp, qolaıly jaǵdaıda úı jumysyn istep, ózin qaýipsiz ortada sezinse, ol da bilim berý sapasyna septigin tıgizedi. Sondyqtan barlyq bilim berý uıymdarynda kiltke jabylmaıtyn, jańa formattaǵy, reakratsııalyq kitaphanalar uıymdastyrýdy tapsyramyn. Bul biraz memleketterdiń tájirıbesinde bar másele. Kitaphanalar men oqý zaldary óz aldyna bólek. Ony eshkim jaýyp tasta dep jatqan joq. Biraq qosymsha, ashyq formattaǵy múmkindikter bolý qajet. Muny da biz qadaǵalap, baqylaýda ustaımyz. Qajet deseńizder, bul shara «Oqýǵa qushtar» jobasynyń bir bóligi», - dedi Ashat Aımaǵambetov.