Ashat Aımaǵambetov: Ǵylym salasynda JOO-larmen jumys isteý mańyzdy

NUR-SULTAN. QazAqparat – Bilim jáne ǵylym mınıstri Ashat Aımaǵambetov elimizde bıotehnologııa ǵylymyn damytýda qandaı máselelerge nazar aýdarylýy kerektigin aıtty, dep habarlaıdy QazAqparat tilshisi.

«Bıotehnologııa baǵyty farmatsevtıkalyq keshen bolsyn, fýndamentaldy ǵylym bolsyn óte mańyzdy bolyp tur. Aýyl sharýashylyǵyn damytý úshin Memleket basshysy úlken mindetterdi Úkimetke júktedi. Tıisti mınıstrlik bul jumysty júrgizýde. Bizdiń taraptan ǵylymı súıemeldeý qajet. Kóp máseleni tájirıbeni engizý kerek. Kommertsııalandyrý boıynsha da áli de kóp jumys atqarylýy kerektigi kórinip otyr. «Munyń aldynda materıaldyq-tehnıkalyq baza joq, eshteńe joq» degen syńaıdaǵy másele bolatyn. Qazir Memleket basshysynyń qoldaýynyń arqasynda bıyl jáne kelesi jyly ǵylymı ınstıtýttardyń materıaldyq-tehnıkalyq bazasyn nyǵaıtý úshin mıllıardtaǵan aqsha bólinedi», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.

Mınıstr ıaǵnı, bul maqsatta ınstıtýttarǵa qajetti materıaldardy, qural-jabdyqtardy alýǵa múmkindik bolatynyn aıtady.

«Árıne taǵylymdamadan ótkizý boıynsha da jaqsy múmkindik paıda boldy. Ǵylymı qyzmetkerlerdi taǵylymdamaǵa jiberip, basqa da memleketterdiń zerthanalarynda jumys isteý múmkindigi jolǵa qoıylyp otyr. JOO-larmen jumys isteý óte mańyzdy. Birge kadrlardy daıarlaý kerek. Óte myqty ǵalymdar bar. Sol ǵalymdar bilimin taratyp, ýnıversıtetterde dáris berý – barlyq ınstıtýttardyń mańyzdy baǵyty bolýy kerek dep sanaımyn. Sondyqtan osy jumysty qolǵa alý kerek», - dedi ol.