Asa iri alaıaqtyq jasady degen kúdikti Reseıden ekstradıtsııalandy

ASTANA. KAZINFORM — QR Bas prokýratýrasy asa iri mólsherde alaıaqtyq jasaǵany úshin qylmystyq jaýaptylyqqa tartý maqsatynda Qazaqstan azamatyn Reseı Federatsııasynan ekstradıtsııalady.

Kúdikti 2023 jyly Koreıa Respýblıkasynan avtokólikterdi naryqtyq baǵadan tómen baǵamen jetkizýge ýáde berip, alaıaqtyq jolmen 6 jábirlenýshi — Almaty qalasy turǵyndarynyń qarajatyn ıemdenip, olarǵa jalpy kólemde 145 mıllıon teńgeden astam zalal keltirgen.

Qylmys jasaǵannan keıin kúdikti jasyrynyp, soǵan baılanysty ol halyqaralyq izdeýge jarııalanǵan.

— Bıylǵy jyldyń sáýirinde ol Reseı Federatsııasynyń Krasnodar ólkesinde ustalyp, sodan keıin Qazaqstan Respýblıkasy Bas prokýratýrasynyń suraýy boıynsha Otanyna ekstradıtsııalandy. Qazir kúdikti tergeý ızolıatoryna qamaldy. Aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan, — dep atap ótti Bas prokýratýranyń baspasóz qyzmeti.

Aıta keteıik, osyǵan deıin Aqsýda bala zorlap, ony óltirgeni úshin halyqaralyq izdeýde júrgen kúdikti Reseıden ekstradıtsııalandy.