Arystanbek Muhamedıulynyń advokaty jazany jeńildetýdi surady
«Sybaılas jemqorlyqqa qarsy qyzmet zańdy buzyp, sotqa deıingi tergeý merzimderin keshiktirdi. Merzim ótkennen keıin kez kelgen tergeý áreketteri jáne óndiris tolyǵymen zańsyz. Biz 221 mıllıon 411 myń teńge somasyndaǵy azamattyq talappen kelispeımiz. Bizdiń oıymyzsha, birinshi satydaǵy sot shyǵyn somasyn negizsiz anyqtady. Sot keltirilgen shyǵyn 155 mıllıon 100 myń teńge dep eseptedi. Onyń ústine, A. Muhamedıulynyń jubaıy sotqa deıingi tergeý barysynda 111 mıllıon 271 myń teńge somasyndaǵy shyǵyndy ishinara ótedi. Degenmen, bizge túsiniksizdigi jalpy somadan bólek (155 mıllıon 100 myń teńge) taǵy 43 mln teńgege shyǵyndy óteýdi talap etti. Onyń ústine, keltirilgen zalaldy 4 sottalýshy bólip tóleý kerek, ıaǵnı árqaısysyna 38 mln teńgeden keledi», - dedi A. Muhamedıulynyń advokaty Áıgerim Ánýarbek sot barysynda.
Onyń aıtýynsha, sot shyǵyndy óteýde durys eseptemegen. Sottalýshy men onyń advokaty sottyń zalaldy óteý sheshimimen kelispeı otyr.
«Biraq sot túsiniksiz jaǵdaıda A. Muhamedıulynyń áıeli Ysqaqova ótegen zalaldy barlyq sottalýshyǵa bólip tastaǵan. Ótelgen soma tek A. Mýhamedıuly úshin tólendi. Nátıjesinde Muhamedıuly taǵy bereshek bolyp otyr», - deıdi advokat.
Sondaı-aq, advokat Arystanbek Mýhamedıulynyń jazasyn jeńildetýdi surady.
«Men jazany jeńildetýdi suraımyn. Eger keltirilgen shyǵynnyń belgili bir bóliginiń ótelgenin eskersek, Ysqaqova tólegen 72 mıllıon teńge qaldyq soma retinde keri qaıtarýǵa jatady. Bul - otbasylyq aqsha. Bul jerde aýdıt boıynsha dáıekter naqty emes. Sot barysynda Damý aýdıtorlyq kompanııasy 2020 jylǵy 4 mamyrdaǵy №1 sharttyń kóshirmesin usyndy. Shart aýdıtorııalyq kompanııa men Astananyń Antıkory arasynda jasalǵan. Taǵy bir jaıt, shartqa Antıkordyń qatardaǵy qyzmetkeri qol qoıǵan, aýdıtorlyq zań boıynsha birinshi basshynyń qoly bolýy kerek», - deıdi Á. Ánýarbek.
Búgin saǵat 17:00-de atalǵan sot otyrysy jalǵasady.
Eske salaıyq, Ulttyq mýzeıdiń burynǵy dırektory Arystanbek Muhamedıuly 2022 jyly 28 mamyrda qamaýǵa alynǵan edi. Oǵan «Altyn adamnyń álem mýzeılerine sherýi» halyqaralyq kórmesin ótkizý kezinde memlekettik satyp alý týraly shart aıasynda bıýdjet qarajatyn jymqyrdy degen aıyp taǵyldy. Aıta ketsek, sot barysynda Arystanbek Muhamedıuly óz kinásin moıyndamady.
Bıyl 20 maýsymda sot úkimimen Arystanbek Muhamedıuly 8 jylǵa bas bostandyǵynan aıyryldy. Sonymen qatar, elorda soty onyń sybaılastaryna da úkim shyǵardy. Ulttyq mýzeıdiń burynǵy basshysynyń 3 sybaılasy da 7 jylǵa sottaldy.
26 shildede Arystanbek Muhamedıulynyń qorǵaýshysy sotqa isti qaıta qaraý týraly apellıatsııalyq shaǵym túsirdi.
12 qyrkúıek kúni elorda soty Arystanbek Muhamedıulynyń qorǵaýshysynan túsken apellıatsııalyq shaǵymdy qaraýdy bastady.
