Arystanbek Muhamedıuly sotta kinásin moıyndamady

ASTANA. QazAqparat – Elordada Ulttyq mýzeıdiń burynǵy basshysy Arystanbek Muhamedıulynyń isi sotta qaralyp jatyr. Protsess barysynda aıypty kinásin moıyndamady, dep habarlaıdy QazAqparat tilshisi.

«Memleket basshysy Qasym-Jomart Toqaevtyń jarlyǵyn oryndaý maqsatynda men Qazaqstanǵa Úndistannan ulttyq biregeı qazyna - «Altyn adam» brendin tutastaı ári aman-saý qaıtardym. Atalǵan mura Memleket basshysy jarlyǵynyń ýaqtyly berilýiniń arqasynda jáne Qazaqstannyń Úndistandaǵy elshiliginiń kómegimen pandemııa kezinde, ıaǵnı lokdaýn engizilgenge deıin qaıtaryldy», - dedi sotta Arystanbek Muhamedıuly.

Onyń málimetinshe, «Altyn adam» elimizge 2020 jylǵy 22 naýryzda dıplomatııalyq poshta arqyly jetkizilgen.

«Úndistanda karantın shekteýleri 2021 jyldyń aıaǵynda ǵana alynyp tastaldy. Eger aıyptaý aktisiniń nusqaýyna súıene otyryp, koronavırýs órship turǵan kezde ulttyq murany Úndistanda 2 jylǵa jýyq ýaqytqa qaldyryp ketsek, onda tek Qazaqstan ǵana emes, búkil adamzat úshin qadirli qazynamyzdan aıyrylyp qalar edik. Sondyqtan meni aıyptaý aktisimen múldem kelispeımin, óz kinámdi tolyq moıyndamaımyn», - deıdi A. Muhamedıuly.

Buǵan deıin habarlaǵanymyzdaı, sot Arystanbek Muhamedıulyn úıqamaqqa aýystyrýdan bas tartty.

Eske salaıyq, Ulttyq mýzeı dırektory Arystanbek Muhamedıuly byltyr 28 mamyrda qamaýǵa alynǵan edi.